ചിത്രം: Unsplash വഴി
നിങ്ങൾ വിവാഹിതരാണെന്നും ജീവിതപങ്കാളിയോട് പതിവായി നിസ്സംഗത പുലർത്തുന്നുവെന്നും കരുതുക; അത് ഒരു പ്രശ്നമായിരിക്കും. മറ്റൊരാളുടെ നന്മയിൽ ആത്മാർഥമായ കരുതലില്ലാതിരിക്കുന്നതാണ് നിസ്സംഗത. മറവി നിസ്സംഗതയുടെ ഒരു ലക്ഷണമാണ്; കാരണം, കരുതൽ കുറയുമ്പോൾ മറക്കാൻ എളുപ്പമാണ്. ഉദാഹരണത്തിന്, നിങ്ങളുടെ ദാമ്പത്യജീവിതത്തിലെ പ്രധാനപ്പെട്ട ഒരു വാർഷികദിനം നിങ്ങൾ മറന്നുപോയെങ്കിൽ, അത് ഒന്നുകിൽ വളരെ ദുർബലമായ ഓർമശക്തിയുടെ അടയാളമായിരിക്കാം, അല്ലെങ്കിൽ കരുതലില്ലാത്ത, നിസ്സംഗമായ ഒരു ഹൃദയത്തിന്റെ അടയാളമായിരിക്കാം. രണ്ടാമത്തേതാണ് കാരണമെങ്കിൽ, അത് ആ ബന്ധത്തിൽ വലിയ വേദനയുണ്ടാക്കുന്നു. ഇത്രയധികം വേദനയുണ്ടാകുന്നതിന്റെ ഒരു കാരണം, ആ വേദനയുടെ കാരണം എളുപ്പത്തിൽ തിരിച്ചറിയാൻ കഴിയാത്തതാണ് എന്നതാണ്. ഒരാൾ സജീവമായി വേദനിപ്പിക്കുന്ന എന്തെങ്കിലും ചെയ്താൽ, അത് ചൂണ്ടിക്കാണിക്കുക കൂടുതൽ എളുപ്പമാണ്. നിസ്സംഗത ഒരു നിഷ്ക്രിയമായ പ്രവൃത്തിയാണ്; കാരണം, അതിൽ ഉണ്ടാകേണ്ട എന്തോ ഒന്ന് ഇല്ലാതിരിക്കുന്നു. എന്നാൽ ഈ നിഷ്ക്രിയമായ പ്രവൃത്തിയും കൂടുതൽ പ്രകടമായ ഒരു പ്രവൃത്തിയോളംതന്നെയോ അതിലധികമോ വേദനിപ്പിക്കുന്നതാകാം. ദൈവവുമായുള്ള ബന്ധത്തിലും ഇതുതന്നെയാണ് സംഭവിക്കുന്നത്. നാം അവിടുത്തോടും അവിടുത്തെ കരുണയോടും നിഷ്ക്രിയമായ നിസ്സംഗത പുലർത്തുമ്പോഴും, രാപ്പകൽ അവിടുത്തിലേക്കു തിരിയാൻ “മറക്കുമ്പോഴും”, അവിടുത്തെ തിരുഹൃദയത്തെ നാം ഏറെ വേദനിപ്പിക്കുകയാണ് (കാണുക ഡയറി #1537).
ഇന്ന് നിങ്ങളുടെ മനസ്സാക്ഷി പരിശോധിച്ച്, നിസ്സംഗതയുമായി ബന്ധപ്പെട്ട് നിങ്ങൾ നേരിടുന്ന ഏതെങ്കിലും പോരാട്ടം സത്യസന്ധമായി തിരിച്ചറിയാൻ ശ്രമിക്കുക. അത് നിങ്ങൾക്ക് വ്യക്തമായി മനസ്സിലാകണമെന്നില്ല. ഇതൊരു പാപമാണെന്നും മറ്റുള്ളവരെ ഏറെ വേദനിപ്പിക്കുന്നതിന് കാരണമാകുന്നുവെന്നും നിങ്ങൾ തിരിച്ചറിഞ്ഞിട്ടുപോലുമുണ്ടാകില്ല. എന്നാൽ ഇത്തരത്തിലുള്ള അവഗണന കാലക്രമേണ ആഴമായ മുറിവുകളുണ്ടാക്കുന്നു. സത്യസന്ധമായി ആത്മശോധന നടത്താൻ ശ്രമിക്കുക. ഇതു നിങ്ങളുടെ പാപമാണെന്ന് തിരിച്ചറിയുന്നെങ്കിൽ, അതിനു പരിഹാരം ചെയ്യാൻ മടിക്കരുത്. ദൈവം നിങ്ങളുടെ ജീവിതത്തിൽ നൽകിയിരിക്കുന്നവരോടുള്ള കരുതൽ പുതുക്കുക. പ്രത്യേകിച്ച്, ദൈവത്തോടും അവിടുന്ന് ചൊരിയാൻ ആഗ്രഹിക്കുന്ന കരുണയോടുമുള്ള ഹൃദയത്തിന്റെ താത്പര്യം പുതുക്കുക. ദൈവത്തിന്റെ കരുണയോട് നിങ്ങൾ നിസ്സംഗരായിരിക്കുന്നെങ്കിൽ, അത് അവിടുത്തെ ഹൃദയത്തെ മുറിപ്പെടുത്തുകയും കാലക്രമേണ നിങ്ങൾക്കുതന്നെ കൂടുതൽ ദോഷം വരുത്തുകയും ചെയ്യുന്നു.
കർത്താവേ, എനിക്കു കഴിയുന്നത്ര ആഴത്തിൽ കരുതൽ പുലർത്താൻ ഞാൻ ആഗ്രഹിക്കുന്നു. എന്റെ ജീവിതത്തിലുള്ള മറ്റുള്ളവരെക്കുറിച്ച് നിരന്തരം ബോധവാനായിരിക്കാനും അവരുടെ ആവശ്യങ്ങൾ മുൻകൂട്ടി മനസ്സിലാക്കി അവർക്കു സ്നേഹം സമൃദ്ധമായി പകരാനും എന്നെ സഹായിക്കണമേ. അങ്ങയുടെ കരുണയെക്കുറിച്ചും നിരന്തരം ബോധവാനായിരിക്കാനും അതിപരിശുദ്ധമായ ഈ ദാനത്തോട് ഒരിക്കലും നിസ്സംഗത പുലർത്താതിരിക്കാനും എന്നെ സഹായിക്കണമേ. ഈശോയെ, ഞാൻ അങ്ങയിൽ ശരണപ്പെടുന്നു.
ക്രിസ്തുരാജനോടുള്ള നൊവേന
പരമ്പരാഗതമായി ക്രിസ്തുരാജന്റെ മഹോത്സവത്തിനു മുമ്പുള്ള ഒമ്പതു ദിവസങ്ങളിൽ
2026 നവംബർ 13–21 വരെ ദിവസവും ചൊല്ലുന്ന നൊവേന
ദൈവകരുണയെക്കുറിച്ചുള്ള കൂടുതൽ വിചിന്തനങ്ങൾ
