ప్రార్థనలో ఉన్న అలెగ్జాండ్రియా పునీత కతరీనా — చిత్రణ: టిషియన్
ఆంగ్లంలో వినండి
మీ జీవితంలో భయం ఉందా? కొన్ని రకాల భయం ఒక విధమైన గర్వం నుంచి పుట్టి ఎంతో హానికరంగా ఉంటాయని, మరొక రకమైన భయం దేవునిపట్ల మీకున్న గాఢమైన ప్రేమ నుంచి కలిగి ఎంతో మేలు చేస్తుందని తెలుసుకోవడం ముఖ్యం. “పవిత్రమైన భయం” అంటే బిడ్డకు సహజమైన భయం, అనగా దేవుని బిడ్డకు ఉండే భయం. దేవునిపట్ల మీ ప్రేమ ఎంత గాఢంగా ఉంటుందంటే, ఆయనతో మీ బంధానికి హాని కలిగించే ఏ పని చేయడానికైనా మీరు భయపడతారు; అప్పుడు ఈ ప్రత్యేకమైన భయం మీలో ఉంటుంది. అంటే దేవుని పట్ల మీకు భయం ఉందని కాదు; బదులుగా, ప్రతి పాపాన్నీ నివారించాలనే పవిత్రమైన కోరిక మీలో ఉంటుంది. ఇటువంటి పవిత్రమైన భయం ఇతరులతో మీకున్న ప్రతి ప్రేమబంధంలోనూ ఉండాలి. ఆశీర్వాదంగా మీరు పొందిన ప్రతి బంధానికీ హాని కలిగించేవాటన్నిటినీ నివారించాలని మీరు గాఢంగా కోరుకోవాలి. ఇది దేవుని అపారమైన కారుణ్యం ప్రసాదించే వరం (చూడండి దినచర్య #610).
దేవునిపట్ల మీకున్న ప్రేమను పరిశీలించండి. ఆ బంధానికి హాని కలిగించగల ప్రతిదానినీ నివారించాలనే మేలైన కోరికను మీ హృదయంలో కలిగించేంత బలం ఆ ప్రేమకు ఉందా? మన ప్రభువుతో ఎంతో వ్యక్తిగతమైన, గాఢమైన బంధాన్ని పెంపొందించుకోవడానికి ఈ పవిత్రమైన భయం ఒక ప్రేరణాశక్తిగా మారాలి. ఇతరులతో మీకున్న బంధాలను కూడా పరిశీలించండి. వారిని హృదయపూర్వకంగా ప్రేమించడానికి అడ్డుగా ఉన్న దేనినైనా తొలగించుకోవాలనే మేలైన కోరిక మీలో ఉందా? దేవుని కారుణ్యం ప్రసాదించే ఈ వరాన్ని కోరుకోండి; అప్పుడు ప్రభువు మిమ్మల్ని తనకూ, ఇతరులకూ మరింత దగ్గరగా తీసుకువస్తాడు.
ప్రభువా, నేను నిన్ను నిజంగా ప్రేమిస్తున్నాను. నిన్ను నా పూర్ణహృదయంతో ప్రేమించకుండా అడ్డుపడుతున్న నా జీవితంలోని ప్రతిదానినీ నీకు సమర్పించాలని కోరుకుంటున్నాను. నేను నీకు మరింత దగ్గరై, నీవు ఇతరులను ప్రేమించినట్లే వారిని ప్రేమించడం నేర్చుకునేలా నాకు పవిత్రమైన భయాన్ని ప్రసాదించు. యేసూ, నేను నీపై నమ్మకం ఉంచుతున్నాను.
పాస్కా కాలానికి పవిత్ర గ్రంథ ధ్యానాలు
పాస్కా కాలానికి పవిత్ర గ్రంథ ధ్యానాలు
దైవకారుణ్యంపై మరిన్ని ధ్యానాలు




