Ang Pagduaw, ni Domenico Ghirlandaio
Paminaw sa Iningles
Makapahupay gayod ang pagbaton og usa ka tawo nga imong kasultihan sa kinaladman sa imong kalag. Dakong panalangin ang ingon niining kasaligan nga tawo kon hingpit niyang tipigan ang imong mga tinago ug hatagan ka og kalooy ug pagsabot. Bisan ang pagsulti sa imong mga sala nga walay pagpanuko makahatag og dakong kaayohan kon ang tawo nga atong gisultihan niini motubag uban sa hingpit nga gugma ug makahatag kanimo sa Kalooy sa Diyos. Kitang tanan nanginahanglan og ingon niining kasaligan nga kasultihan. Apan sa pagkatinuod, aduna gayod kitay ingon niana! Anaa ang pari, nga naghulat kanato diha sa mahimayaong Sakramento sa Pakig-uli. Sigurado nga tipigan niya ang imong mga tinago, gitanyag niya ang iyang pagkamabination ug kalooy, ug ang kapasayloan ug Kalooy sa Diyos gibubo ngadto sa kinalawman ug labing mangitngit nga mga tinago sa imong kasingkasing. Ayaw pagpanuko ug ayaw paglangan sa pagduol sa Kumpisal. Gikinahanglan nimo kining gasa gikan sa atong Ginoo ug pinaagi niini panalanginan ka Niya sa madagayaong Kalooy (Tan-awa ang Talaan sa Adlaw-adlaw #1464).
Pamalandongi sa matinud-anon ang kinalaloman ug “labing mangitngit” nga sala sa imong kasingkasing. Unsa man ang labing gikahadlokan nimong ipadayag? Hilabihan ang tinguha sa Ginoo nga mosulod nianang kangitngit ug magdala sa makaayong balsamo sa Iyang kahayag ug Kalooy. Pasudla Siya pinaagi sa Sakramento sa Pakig-uli. Ang gahom niini nga Sakramento walay katupong ug mao gayod ang imong gikinahanglan aron magsugod ang imong pagkaayo ug mahigawas ka sa imong mga palas-anon. Ayaw kini kahadloki ug ayaw kini ilangan. Buhata karon ang usa ka buhat sa pagtuo niining mahimayaong Sakramento, ug mahibulong ka sa epekto niini sa imong kinabuhi.
Ginoo, palihog hatagi ako og kaisog sa pagkumpisal sa akong mga sala diha sa Sakramento sa Pakig-uli. Palihog hatagi usab ako og kaalam aron masabtan ko nga kini usa sa Imong labing dagkong mga gasa. Niining Sakramento, masinati ko ang Imong Kalooy sa labing bug-os nga paagi. Salamat Kanimo, hinigugmang Ginoo, alang niining dili mabayrang gasa. Hesus, nagasalig ako Kanimo.
Nobena kang San Judas Tadeo
Alang sa mga Sitwasyon ug mga Kaso nga Daw Wala nay Paglaom
Ampoon bisan kanus-a sa tuig, ilabina sa Oktubre 19–27
Ang Oktubre mao ang bulan sa Santos nga Rosaryo
Dugang nga mga Pamalandong sa Diyosnong Kalooy
Adlaw-adlaw nga mga Pagpamalandong sa Ebanghelyo
Mga Santos/Kasaulogan Karong Adlawa




