Hulagway gikan sa Needpix
Paminaw sa Iningles
Ang tanan gitawag sa pagkabalaan ug pinaagi niana nga pagkabalaan makakab-ot sa hingpit nga kalipay. Apan ang Diyos kanunayng mopili og pipila alang sa usa ka pinasahing misyon sa pagkabalaan, usa ka mas hataas nga matang sa pagkabalaan. Kining mga kalaga mahimong tawgong “Serapikong mga Kalag.” Ang kasagarang pananglitan mao ang pagtandi sa duha ka baso nga adunay tubig. Ang usa dako ug ang usa gamay. Silang duha gipuno hangtod sa ngilit, busa silang duha puno. Apan ang usa adunay mas daghang tubig. Ingon usab niana ang pagkabalaan. Ang uban gihatagan og pinasahing tawag sa pagkab-ot sa mas hataas nga ang-ang. Ang tanang tawo kinahanglan “mapuno” sa Espiritu Santo ug, sa ingon, makakab-ot sa hingpit nga kalipay. Apan ang uban gidapit sa mas hataas nga ang-ang sa usa ka talagsaong paagi. Susama kini sa Siyam ka Koro sa mga Anghel. Ang mga Serapin anaa sa labing hataas nga han-ay ug ang ilang bugtong katuyoan mao ang pagsimba ug pag-adorar sa Diyos. Ang mga Anghel nga Magbalantay anaa sa labing ubos nga han-ay ug ang ilang nag-unang katungdanan mao ang pag-alagad sa tawo. Ang matag langitnong binuhat hingpit nga malipayon ug nagmaya sa talagsaong tawag sa matag usa (Tan-awa ang Diary #1556).
Pamalandongi karong adlawa kining mahimayaong pagkahan-ay sa pagkabalaan alang sa mga anghel ug sa katawhan. Sa sinugdan, daw dili makataronganon nga ang uban gihatagan og espesyal nga tawag ngadto sa pagkabalaan ug bisan og espesyal nga pag-ambit sa mga pag-antos ni Kristo. Kinahanglan natong tanan palandongon kini nga kamatuoran ug magkalipay niini. Ug mahitungod niadtong serapikong mga kalag sa kalibotan, ug niadtong gihatagan og espesyal nga tawag sa pag-ambit sa mga pag-antos ni Kristo, angay natong pangitaon sila ug tinguhaon ang kaalam ug grasya nga nagagikan sa ilang kinabuhi. Adunay maayong hinungdan ang Diyos alang niining pagkahan-ay; atong katungdanan ang pagdawat niini uban sa kalipay ug ang pagpahimulos sa mga kaayohan sa ilang bulahang bokasyon.
Ginoo, nagpasalamat ako Kanimo tungod sa Imong hingpit nga kaalam sa paghan-ay sa pagkabalaan sa mga anghel ug sa katawhan. Tabangi ako nga kanunayng mangita niadtong serapikong mga kalag, ang pinasahing mga santos, nga nakakab-ot sa mahimayaong ang-ang sa pagkabalaan. Salamat sa ilang pagpamatuod ug salamat sa pag-antos nga ilang kinabubut-ong gidawat. Hinaot nga ang kalibotan padayong mapanalanginan pinaagi sa ilang mga kinabuhi. Hesus, misalig ako Kanimo.
Santo sa Adlaw – Santa Isabel sa Hungriya, Relihiyosa
Nobena kang Kristo nga Hari
Sa naandan, siyam ka adlaw sa dili pa ang Solemnidad ni Kristo nga Hari
Nobena nga ampoan matag adlaw gikan sa Nobyembre 13–21, 2026
Dugang nga mga Pamalandong sa Diyosnong Kalooy
Adlaw-adlaw nga mga Pagpamalandong sa Ebanghelyo
Mga Santos/Mga Kapistahan Karong Adlawa




