मराठी

चिंतन 321: सेराफिमसारखा आत्मा

प्रतिमा: नीडपिक्सच्या सौजन्याने

व्हिडिओ

प्रत्येकाला पावित्र्याचे पाचारण आहे आणि त्या पावित्र्यात प्रत्येकाला परिपूर्ण आनंद मिळू शकतो. पण देव नेहमीच काही जणांना पावित्र्याच्या एका विशेष कार्यासाठी, म्हणजे पावित्र्याच्या अधिक उंच पातळीवर पोहोचण्यासाठी, निवडतो. अशा आत्म्यांना “सेराफिमसारखे आत्मे” म्हणता येईल. हे समजून घेण्यासाठी पाण्याच्या दोन पेल्यांची तुलना करण्याचे नेहमीचे उदाहरण घेऊ या. एक पेला मोठा आहे आणि दुसरा लहान आहे. दोन्ही पेले काठोकाठ भरले आहेत, त्यामुळे दोन्हीही पूर्ण भरलेले आहेत. पण एका पेल्यात जास्त पाणी आहे. पावित्र्याचेही तसेच आहे. काहींना पावित्र्याची अधिक उंची गाठण्याचे विशेष पाचारण मिळते. सर्वांनी पवित्र आत्म्याने “परिपूर्ण” व्हावे आणि अशा रीतीने परिपूर्ण आनंद मिळवावा. पण काहींना एका आगळ्या रीतीने अधिक उंची गाठण्याचे आमंत्रण दिले जाते. देवदूतांच्या नऊ श्रेणींचेही असेच आहे. सेराफिम हे सर्वोच्च श्रेणीतील देवदूत आहेत. देवाची उपासना आणि आराधना करणे हाच त्यांचा एकमेव हेतू आहे. संरक्षक देवदूत सर्वांत खालच्या श्रेणीतील आहेत आणि मानवाची सेवा करणे हे त्यांचे मुख्य कर्तव्य आहे. प्रत्येक स्वर्गीय जीवाला परिपूर्ण आनंद लाभतो आणि प्रत्येकाला मिळालेल्या आगळ्या पाचारणात ते सर्व आनंद मानतात (पाहा दैनंदिनी #1556).

देवदूतांसाठी आणि मानवजातीसाठी देवाने पावित्र्याची जी गौरवशाली व्यवस्था केली आहे, तिचे आज चिंतन करा. काहींना पावित्र्यासाठी विशेष पाचारण मिळते, इतकेच नव्हे तर ख्रिस्ताच्या दुःखभोगांत विशेष रीतीने सहभागी होण्याची संधीही मिळते, हे प्रथमदर्शनी न्याय्य वाटणार नाही. आपण सर्वांनी या सत्यावर मनन करावे आणि त्यात आनंद मानावा. जगात जे सेराफिमसारखे आत्मे आहेत आणि ज्यांना ख्रिस्ताच्या दुःखभोगांत सहभागी होण्याचे विशेष पाचारण मिळाले आहे, अशा व्यक्तींचा आपण शोध घ्यावा आणि त्यांच्या जीवनातून लाभणारे ज्ञान व कृपा मिळवण्याचा प्रयत्न करावा. देवाने अशी व्यवस्था करण्यामागे योग्य कारण आहे; ती आनंदाने स्वीकारणे आणि त्यांच्या धन्य पाचारणाचा लाभ घेणे हे आपले कर्तव्य आहे.

हे प्रभू, देवदूतांच्या आणि मानवजातीच्या पावित्र्याची व्यवस्था करताना तू दाखवलेल्या परिपूर्ण ज्ञानाबद्दल मी तुझे आभार मानतो. पावित्र्याच्या गौरवशाली उंचीवर पोहोचलेल्या त्या सेराफिमसारख्या आत्म्यांचा, त्या विशेष संतांचा, सदैव शोध घेण्यास मला मदत कर. त्यांनी दिलेल्या साक्षीबद्दल आणि त्यांनी स्वेच्छेने स्वीकारलेल्या दुःखाबद्दल मी तुझे आभार मानतो. त्यांच्या जीवनातून जगाला निरंतर आशीर्वाद लाभो. हे येशू, माझा तुझ्यावर विश्वास आहे.

आजची संत – हंगेरीची संत एलिझाबेथ, व्रतस्थ धर्मभगिनी

ख्रिस्तराजाची नोव्हेना
परंपरेनुसार ख्रिस्तराजाच्या महोत्सवापूर्वीचे नऊ दिवस
13 ते 21 नोव्हेंबर 2026 या काळात दररोज म्हटली जाणारी नोव्हेना

दैवी दयेवरील आणखी चिंतने

सुवार्तेवरील दैनंदिन चिंतन

आजचे संत व सण