వీడియో ఆంగ్లంలో వినండి
మనకు తెలిసిన వారందరూ పరలోకానికి వెళ్తారని భావించడం సులభమే. నిజానికి, ఇదే మన ఆశగా ఉండాలి. అయితే పరలోకాన్ని చేరుకోవాలంటే, నిజమైన అంతరంగ పరివర్తన తప్పనిసరి. పరలోకంలో ప్రవేశించే ప్రతి ఒక్కరూ తమ జీవితాన్ని క్రీస్తుకు సమర్పించి, పాపం నుండి మరలాలని వ్యక్తిగతంగా నిర్ణయించుకోవడం వల్లనే అక్కడ ఉంటారు. ఈ ప్రయాణంలో మన చుట్టూ ఉన్నవారికి మనం ఎలా తోడ్పడగలం? మనం చేయగల అత్యంత ముఖ్యమైన పని వారి కోసం ప్రార్థించడం. కొన్నిసార్లు మరొకరి కోసం ప్రార్థించడం వ్యర్థమనీ, ఫలితం లేనిదనీ అనిపించవచ్చు. మనకు వెంటనే ఫలితాలేవీ కనిపించకపోవడంతో, వారి కోసం ప్రార్థించడం సమయం వృథా చేయడమే అని నిర్ణయించుకోవచ్చు. అయితే ఆ ఉచ్చులో పడకండి. దేవుడు మీ జీవితంలోకి తీసుకువచ్చిన వారి కోసం ప్రార్థించడం, మీరు వారికి చూపగల అత్యంత గొప్ప కారుణ్య కార్యం. నిజానికి, మీ ప్రార్థనే వారి నిత్య రక్షణకు కీలకం కావచ్చు (చూడండి డైరీ #150).
దేవుడు మీ జీవితంలో ఉంచిన వారి గురించి ఆలోచించండి. వారు కుటుంబ సభ్యులైనా, స్నేహితులైనా, సహోద్యోగులైనా లేదా కేవలం పరిచయస్థులైనా, వారి కోసం ప్రార్థించాల్సిన బాధ్యత మీకు ఉంది. మీ చుట్టూ ఉన్నవారి కోసం మీరు ప్రతిరోజూ చేసే ప్రార్థన, సులభంగా ఆచరించగల ఒక కారుణ్య కార్యం. ఈ రోజు మీ జీవితంలో ప్రార్థన అత్యంత అవసరమై ఉండవచ్చిన వారిని గుర్తుచేసుకొని, కొద్దిసేపు ఆగి వారిని దేవునికి సమర్పించండి. మీరు అలా చేసినప్పుడు, దేవుడు వారిపై తన కృపను కుమ్మరిస్తాడు; ఈ ఔదార్య కార్యానికి ప్రతిఫలంగా మీ ఆత్మకు కూడా బహుమానం అనుగ్రహిస్తాడు.
ప్రభువా, ఈ క్షణంలో నీ దైవకారుణ్యం అత్యంత అవసరమైన వారందరినీ నీకు సమర్పిస్తున్నాను. నా కుటుంబ సభ్యుల కోసం, స్నేహితుల కోసం, నీవు నా జీవితంలో ఉంచిన వారందరి కోసం ప్రార్థిస్తున్నాను. నన్ను బాధపెట్టిన వారి కోసం, తమ కోసం ప్రార్థించడానికి ఎవరూ లేని వారి కోసం ప్రార్థిస్తున్నాను. ప్రభువా, ప్రత్యేకంగా (మనసులోకి వచ్చే ఒకరి లేదా మరికొందరి పేర్లు చెప్పండి) కోసం ప్రార్థిస్తున్నాను. నీ బిడ్డ అయిన ఈ వ్యక్తిని సమృద్ధియైన కారుణ్యంతో నింపి, పవిత్రత మార్గంలో సహాయం చేయుము. యేసూ, నేను నీపై నమ్మకం ఉంచుతున్నాను.
ఐదవ రోజు ధ్యానాలు:
ఎడారిలో 40 రోజులు & సిలువ చెంత 40 రోజులు

ఫిబ్రవరి 23 – పునీత పొలికార్పు, పీఠాధిపతి మరియు వేదసాక్షి—ఐచ్ఛిక స్మరణ
దైవకారుణ్యంపై మరిన్ని ధ్యానాలు





