తెలుగు

ధ్యానం 44: ప్రభువు దృష్టి భయాన్ని పారద్రోలుతుంది

Pixabayలో Pete Linforth అందించిన చిత్రం

వీడియో

ఆంగ్లంలో వినండి

మన ప్రభువు రాత్రింబగళ్లు పరిపూర్ణమైన ప్రేమానురాగాలతో మిమ్మల్ని చూస్తున్నారని మీకు తెలుసా.  మీ జీవితంలోని ప్రతి వివరమూ ఆయనకు తెలుసనీ, ప్రతి పరిస్థితిలోనూ ఆయన మీతో నడుస్తున్నారనీ మీకు తెలుసా?  ఇది నమ్మడం కష్టంగా అనిపించవచ్చు, ఎందుకంటే మనం ఆయన స్వరాన్ని చెవులతో వినలేము, ఆయనను మన కళ్లతో చూడలేము, లేదా మన చేతులతో తాకలేము.  కానీ ఆయన సాన్నిహిత్యం భౌతిక ప్రపంచానికి ఎంతో అతీతమైనది, లోతైనది.  ఆయన సాన్నిహిత్యం మన ఆత్మలోకి చూస్తూ మనల్ని ప్రేమించేది.  మనం అనుమతిస్తే, ఆయన ప్రేమపూర్వక దృష్టి జీవితంలోని భయాలన్నిటినీ పారద్రోలుతుంది (చూడండి దినచర్య #90).

మీరు అన్నిటికంటే ఎక్కువగా దేనికి భయపడుతున్నారు?  మీకు అత్యంత ఆందోళన కలిగించేది ఏమిటి?  ఈ రోజు మీ భయానికి కారణాన్ని గుర్తించడానికి ప్రయత్నించండి.  దానిని గుర్తించినప్పుడు, మన కరుణామయుడైన ప్రభువు ఇప్పటికే అదంతా చూశారని తెలుసుకోండి.  మీ పరిస్థితి ఆయనకు తెలుసు, ఆయన మిమ్మల్ని ప్రేమతో చూస్తున్నారు.  మీరు కూడా యేసు వైపు చూడటం, మీ ఆత్మలోనే ఆయన ముఖాన్ని వెదకటం, ప్రేమతో తిరిగి ఆయన వైపు దృష్టి నిలపటం ముఖ్యం.  అలా మన ప్రభువుపై ఏకాగ్రంగా దృష్టి నిలపడం ద్వారా, మిమ్మల్ని కుంగదీసే వాటన్నిటినీ విడిచిపెట్టడానికి అవసరమైన ధైర్యాన్ని మీరు పొందుతారు; ఆయన కృప మిమ్మల్ని ఉన్నత స్థితికి లేవనెత్తేందుకు మీరు అనుమతిస్తారు.  

ప్రభువా, నా భయాలన్నిటి నుండి నా చూపును మరల్చుకోవడానికి నాకు సహాయం చేయుము.  వాటికి బదులుగా, నీ ప్రేమపూర్వక దృష్టిని వెదకడానికీ, నీకు చెందనిదంతా ఆ ప్రేమదృష్టి పారద్రోలేందుకు అనుమతించడానికీ నాకు సహాయం చేయుము.  ప్రభువా, నా ఆత్మలో నివసిస్తున్న నీ ప్రకాశవంతమైన, సుందరమైన ముఖాన్ని చూడగలిగితే చాలు, అన్ని విషయాలలోనూ నాకు ఓదార్పు, ఊరట కలుగుతాయి.  యేసూ, నేను నీపై నమ్మకం ఉంచుతున్నాను.

సామాన్య కాలానికి పవిత్ర గ్రంథ ధ్యానాలు

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు