తెలుగు

ధ్యానం 115: దేవుని చిత్తం మిమ్మల్ని సురక్షితంగా ఉంచుతుంది

శిలువారోహణం చిత్రించినది: గాబ్రియేల్ మెట్సు

వీడియో

ఆంగ్లంలో వినండి

దేవుని చిత్తం అనేది మీ భవిష్యత్తు కోసం ఆయన రూపొందించిన ప్రణాళిక కంటే ఎంతో గొప్పది.  మీ పట్ల ఆయనకున్న ఆశలు, కలల కంటే అది గొప్పది.  ఆయన చిత్తమే మీకు పవిత్రతకు మార్గం; అది అత్యంత గొప్ప ఓదార్పుకు, ఆనందానికి మూలం.  ఆయన చిత్తం క్రియాశీలమైనదీ, నిష్క్రియాత్మకమైనదీ (అనుమతిపూర్వకమైనదీ) కూడా.  మీ కోసం ఆయనకు నిర్దిష్టమైన ప్రణాళికలు ఉన్నాయి; ఆ ప్రణాళికలను వివేచించి, స్వీకరించమని ఆయన మిమ్మల్ని పిలుస్తారు. ఈ విధంగా ఆయన చిత్తం క్రియాశీలమైనది.  మీ సొంత పాపాల వల్ల, సమస్త లోకపు పాపాల వల్ల కొన్ని చెడులు మీకు సంభవించడానికి ఆయన అనుమతిస్తారు. ఈ విధంగా ఆయన చిత్తం నిష్క్రియాత్మకమైనది.  ఏదైనా చెడు లేదా బాధ మీకు సంభవించడానికి దేవుడు అనుమతించినప్పుడు భయపడకండి.  తండ్రి అనుమతిపూర్వక చిత్తం వల్ల కలిగే పరిణామాలను అనుభవించినవారికి యేసు స్వయంగా పరిపూర్ణ ఆదర్శం.  దేవుడు అనుమతించే వాటిని చూసి ఆశ్చర్యపడకండి, మీ విశ్వాసం తడబడనివ్వకండి.  ఆయన నిష్క్రియాత్మకమైన, అనుమతిపూర్వకమైన చిత్తం అన్ని విషయాల్లోనూ ఆయనపై నమ్మకం ఉంచమని మిమ్మల్ని ఆహ్వానిస్తుంది. మీ భవిష్యత్తులో ఏమి జరిగినా, ఆయనపై విశ్వాసంలోనూ నమ్మకంలోనూ ఎదగడానికి అది మీకు వీలు కల్పిస్తుంది.  దేవుడు అనుమతించే వాటికి భయపడకండి. (చూడండి దినచర్య #541).

మీ జీవితంలో జరగడానికి దేవుడు అనుమతించిన విషయాల వల్ల మీరు ఏ విధంగానైనా అయోమయానికి గురయ్యారా, లేదా మీ విశ్వాసం కూడా తడబడిందా అని ధ్యానించండి.  ఆయన ఏమి కోరుకుంటున్నారో, దేనిని అనుమతిస్తున్నారో ఆయనకు తెలుసని గుర్తుంచుకోండి.  ఆయన అనుమతిపూర్వక చిత్తానికి భయపడకండి.  మీకు సంభవించేవాటన్నిటినీ విశ్వాసంతో, ధైర్యనిశ్చయంతో స్వీకరించడానికి భయపడకండి.  మీ పట్ల తన దైవిక సంరక్షణను వెల్లడించడానికీ, ఆయనపై మీ విశ్వాసాన్ని, నమ్మకాన్ని పెంపొందించడానికీ దేవుడు వాటిని అనుమతిస్తారు.

ప్రభువా, నేను బాధపడుతున్నప్పుడు, కొన్నిసార్లు నా పట్ల నీకున్న ప్రేమను, శ్రద్ధను సందేహిస్తాను.  నన్ను నిలబెడుతూ, నడిపిస్తూ నీవు నాతో ఉన్నావా అని ప్రశ్నిస్తాను.  మన లోకంలో పాపం వల్ల కలిగే పరిణామాలన్నిటినీ భరించడానికి నాకు అవసరమైన కృపను దయచేయి.  నన్ను కాపాడే నీ హస్తంపై నమ్మకంతో, ధైర్యంగా నా సొంత పాపపు పరిణామాలను, లోకపు పాపాల పరిణామాలను ఎదుర్కోవడానికి నాకు సహాయం చేయి.  యేసూ, నేను నీపై నమ్మకం ఉంచుతున్నాను.

ఏప్రిల్ 25 – పునీత మార్కు పండుగ

పాస్కా కాల ప్రార్థనలు

పాస్కా కాలానికి పవిత్ర గ్రంథ ధ్యానాలు

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు


ఈ-పుస్తకంగా, కాగితపు అట్టతో ముద్రిత పుస్తకంగా లభిస్తుంది:

అమెజాన్ –  బార్న్స్ అండ్ నోబుల్ – గూగుల్ ప్లే – ఐట్యూన్స్

దైవకారుణ్యంపై దైనందిన ధ్యానాలు:
పునీత ఫౌస్తీనాతో 365 రోజులు