తెలుగు

ధ్యానం 262: ప్రేమ పాలన లేదా న్యాయ పాలన

చిత్రం సౌజన్యం: Pixabay

వీడియో

ఆంగ్లంలో వినండి

మనం దేవుని హస్తం నుండి తప్పించుకోలేము.  విశ్వాన్ని పోషిస్తూ, సమస్తాన్ని ఉనికిలో నిలిపి ఉంచేది ఆయనే.  ఆయన నిరంతర సంరక్షణ లేకపోతే మన ఉనికి అంతమైపోతుంది.  అయితే మనం రెండు విధానాల్లో ఏదో ఒక విధంగా ఆయన పరిరక్షణ హస్తం క్రింద ఉంటాము.  మనం “ప్రేమ పాలన” ద్వారా గానీ, “న్యాయ పాలన” ద్వారా గానీ నడిపించబడతాము.  మనం దేవుని నుండి దూరమైనప్పుడు, ఆయన మన జీవితాలను నడిపించే విధానమే న్యాయ పాలన.  ఇక్కడ గానీ, మరణ సమయంలో గానీ మనం ఆయన న్యాయం నుండి తప్పించుకోలేము.  మనం పాపం చేసినప్పుడు, ముఖ్యంగా తీవ్రమైన పాపం చేసినప్పుడు, దేవుని న్యాయం కారణంగా మన పాపానికి మనం బానిసలమవుతాము.  ఆయన తన గొప్ప కారుణ్యం కారణంగా పాపపు బంధకాన్ని అనుభవించడానికి మనల్ని వదిలివేస్తారు.  మనల్ని పశ్చాత్తాపానికి పిలిచేందుకు ఆయన న్యాయపు కఠిన పరిణామాలు మనపై విధించబడతాయి కాబట్టి, అది కారుణ్యమే.  అయితే ప్రేమ పాలనలో జీవించేవారు పూర్తిగా నూతనమైన స్థాయిలో జీవించే దీవెన పొందుతారు.  ఈ పవిత్ర ఆత్మలు దేవుని కారుణ్యంలో ఆనందిస్తూ, పాపపు పరిణామాల నుండి విముక్తి పొందుతాయి.  వారు పవిత్రాత్మ ప్రసాదించే అనేక ఫలాలను అనుభవిస్తూ, దేవుని పవిత్ర చిత్తానికి అనుగుణంగా ప్రవర్తిస్తారు (చూడండి డైరీ #1315).

మీరు ఏ పాలనలో జీవిస్తున్నారు?  మీరు తరచూ అనుగ్రహ స్థితి నుండి జారిపోతూ, మీ జీవితంలో దేవుని న్యాయాన్ని ఎదుర్కొంటున్నారా?  లేక ఆయన ప్రేమ పాలనలో జీవించడానికి కృషి చేస్తున్నారా?  ఈ రోజు మీరు ఏ స్థితిలో ఉన్నా, అది దేవుని కారుణ్య వరమని తెలుసుకోండి.  మీరు పడిపోయినప్పుడు ఆయన న్యాయం మీ జీవితాన్ని తిరిగి సరైన దారిలో నడిపించనివ్వండి; ఆయన కారుణ్యపు సంపూర్ణ ప్రవాహాన్ని స్వీకరించడానికి ప్రయత్నించండి.  ప్రభువు మిమ్మల్ని ఎన్నడూ విడిచిపెట్టరు; అయితే ఆయన కారుణ్యాన్ని మీరు ఎలా అనుభవిస్తారనేది మీపైనే ఆధారపడి ఉంటుంది.

నా ప్రభువా, నా జీవితంలో నీ కారుణ్యమయ సాన్నిధ్యంతో నిండిపోవాలని కోరుకుంటున్నాను.  ప్రతిరోజూ నా పాపం నుండి వైదొలగి, నీ ప్రేమ పాలనలో జీవించడం ద్వారా కలిగే స్వేచ్ఛను, ఆనందాన్ని అనుభవించాలని ప్రార్థిస్తున్నాను.  ప్రియ ప్రభువా, నీవు నా కోసం సిద్ధం చేసి ఉంచిన సమృద్ధియైన జీవితంలోకి ఆకర్షించబడేలా, నా జీవితంలో ఎల్లప్పుడూ సరైన నిర్ణయాలు తీసుకోవడానికి నాకు సహాయం చేయుము.  యేసూ, నేను నీపై నమ్మకం ఉంచుతున్నాను.

సెప్టెంబర్ 19 – పవిత్ర జానువారియస్, పీఠాధిపతి మరియు హతసాక్షి—ఐచ్ఛిక స్మరణ

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు