తెలుగు

ధ్యానం 349: మీ హృదయ శాంతిని కోల్పోవడం

ఎద్వార్ మనే, సార్వజనిక సంపద, వికీమీడియా కామన్స్ ద్వారా

వీడియో

ఆంగ్లంలో వినండి

మీ హృదయంలోని శాంతినీ ప్రశాంతతనూ హరించే శక్తి దేనికి ఉంది?  మిమ్మల్ని అవమానించినా, ఎగతాళి చేసినా, మీ గురించి తప్పుడు తీర్పు చెప్పినా, చెరసాలలో వేసినా, కొట్టినా, చివరికి చంపినా ఏమవుతుంది?  వీటిలో ఏదైనా మీ హృదయంలోని దేవుని శాంతిని హరించగలదా?  మీరు అనుమతిస్తేనే.  మీరు అనుమతిస్తే తప్ప ఏదీ మీ హృదయ శాంతిని హరించలేదని మీరు తెలుసుకొని, దృఢమైన విశ్వాసంతో నమ్మడం అత్యవసరం.  ఈ లోకంలోని ప్రతిదాని నుండీ స్వేచ్ఛగా ఉండటమే మీ లక్ష్యం కావాలి.  సమస్త సిరిసంపదలు, ఘనతలు, గౌరవం, భయం, అన్నిటిపట్ల మీరు అనాసక్తులై ఉండాలి.  మీరు సంపూర్ణ అనాసక్తితో ఉంటే, క్రీస్తుకు పూర్తిగా అంటిపెట్టుకొని ఉండే స్వేచ్ఛ మీకు ఉంటుంది. మీకు ఏది ఎదురైనా, మీకు ఏది జరిగినా, మన ప్రభువుకూ ఆయన చిత్తానికీ మాత్రమే అంటిపెట్టుకొని ఉండే మీ బంధాన్ని, మీరు అనుమతిస్తే తప్ప, మీ నుండి ఎవరూ ఎన్నటికీ దూరం చేయలేరు (చూడండి దినచర్య #1685).

గతంలో మీ శాంతిని హరించిన విషయాల గురించి ధ్యానించండి.  వాటిని గుర్తించడం వల్ల మీరు దేనిపట్ల అనారోగ్యకరమైన మమకారం కలిగి ఉన్నారో తెలుసుకోగలుగుతారు.  ఉదాహరణకు, నలుగురిలో ఎగతాళికి గురికావడం మీ శాంతిని హరించి ఉంటే, మీ పేరు ప్రతిష్ఠల పట్ల మీకు మితిమీరిన మమకారం ఉందని అర్థం.  పేదరికం మిమ్మల్ని కుంగదీసి ఉంటే, డబ్బు పట్ల మీకు మితిమీరిన మమకారం ఉంది.  స్నేహితులు గానీ కుటుంబ సభ్యులు గానీ మిమ్మల్ని తిరస్కరించడం మీలో కోపాన్ని రేపి ఉంటే, ఆ వ్యక్తి పట్ల మీకు మితిమీరిన మమకారం ఉండిందని అర్థం.  ఈ జాబితా ఇలా సాగుతూనే ఉండవచ్చు.  సంపూర్ణ అనాసక్తి అనే ఆధ్యాత్మిక లక్ష్యాన్ని అర్థం చేసుకోవడం చాలా కష్టంగా, అంగీకరించడం అంతకంటే కష్టంగా అనిపించినా, దానిని తొందరపడి తోసిపుచ్చకండి.  మంచివిగా కనిపించే విషయాల పట్ల కూడా మీకున్న మమకారాల గురించి ధ్యానించండి.  మీరు దేవునికి మాత్రమే అంటిపెట్టుకొని ఉంటే, మేలైనవన్నీ వాటంతట అవే సమకూరుతాయని గ్రహించండి.

ప్రభువా, నా జీవితంలో నాకున్న ఏకైక సంపదగా నిన్నూ నీ చిత్తాన్నీ ఎంచుకుంటున్నాను.  మిగతావన్నీ గతించిపోయేవే; మిగతావన్నీ ఒక్క క్షణంలో కోల్పోవచ్చు.  కానీ ఓ ప్రభువా, నీవు నిత్యుడవు; నేను నిన్ను ఎంచుకుంటే, నిన్ను నా నుండి ఎవ్వరూ ఎన్నటికీ దూరం చేయలేరు.  ప్రియమైన ప్రభువా, నేను నిన్ను ప్రేమిస్తున్నాను; నీకూ నీ చిత్తానికీ దృఢంగా అంటిపెట్టుకొని ఉండటానికి నాకు సహాయం చేయి.  యేసూ, నేను నీపై నమ్మకం ఉంచుతున్నాను.

పునీత ఆండ్రూ క్రిస్మస్ నవదిన ప్రార్థన
సంప్రదాయంగా నవంబరు 30 నుండి క్రిస్మస్ పర్వదినానికి ముందు రోజు వరకు రోజుకు 15 సార్లు ప్రార్థిస్తారు.

ఆగమనకాల వనరులు

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు