తెలుగు

ధ్యానం 176:  లోకపు పాపంతో పోరాడటం

ప్రార్థనలో యువ సన్యాసిని, చిత్రించినవారు సెర్గేయ్ గ్రిబ్కోవ్

వీడియో

ఆంగ్లంలో వినండి

దేవుడు లోకాన్ని చూసినప్పుడు, ఆయనకు ఏమి కనిపిస్తుంది?  నిశ్చయంగా ఆయన తన సృష్టి సౌందర్యాన్ని, తన ప్రణాళికలోని పరిపూర్ణ క్రమాన్ని, తన కుమారులు, కుమార్తెల ఉనికిని చూస్తాడు.  కానీ అసంఖ్యాక పాపాల భయానకతను కూడా ఆయన చూస్తాడు.  అతి స్వల్పమైన పాపం గానీ, లోపం గానీ ఆయన దృష్టి నుండి తప్పించుకోలేదు.  ఒక్క చూపులో లోకంలోని పాపాలన్నిటినీ గ్రహించడానికి ప్రయత్నిస్తున్నట్లు ఊహించుకోండి.  అయితే తన పరిపూర్ణ కారుణ్యంలో, తాను ప్రత్యేకంగా ఎన్నుకున్న వినయపూర్వకమైన, పవిత్రమైన ఆత్మల ద్వారా ఆయన ఓదార్పు పొందడానికి సమ్మతిస్తాడు.  అవును, ప్రజలందరూ ఎన్నుకోబడినవారే; అయితే కొన్ని ఆత్మలు ఇతరులకన్నా ఎక్కువగా పవిత్రతా శిఖరాలను అందుకోవాలనే పిలుపుకు స్పందిస్తాయి. అలా చేయడం ద్వారా అవి మన లోకంలోని చెడులను శక్తివంతంగా ఎదుర్కొంటాయి.  అంతరంగ పరివర్తనపైనే ఏకైక దృష్టిని నిలిపి, లోకానికి మరుగై, ఏకాంత మఠాలలో సమర్పిత జీవితాన్ని గడిపేవారికి గల విశిష్టమైన పిలుపులలో ఇది ఒకటి.  అటువంటి పవిత్ర ఆత్మలకు కలిగే మేలును మనం చూడలేకపోవచ్చు, కానీ దేవుడు చూస్తాడు; ముఖ్యంగా ఈ ఆత్మలను, పవిత్ర ఆత్మలందరినీ బట్టి ఆయన ఉగ్రత కారుణ్యంగా మారుతుంది (చూడండి దినచర్య #926).

ఎన్నుకోబడిన ఈ ఆత్మలలో మీరు ఒకరనే విషయాన్ని ధ్యానించండి.  ఏకాంత మఠంలోని మరుగైన జీవితానికి మీకు పిలుపు లేకపోవచ్చు, కానీ గొప్ప పవిత్రతను సాధించడానికి మీకు పిలుపు ఉంది.  దేవుడు మీ జీవితంలోని పవిత్రతను చూసినప్పుడు, ఆయన న్యాయం సంతృప్తి చెందుతుంది, ఆయన కారుణ్యం ప్రవహిస్తుంది.  మీరు చెప్పే మాటలు, మీ ఆలోచనలు, మీరు చేసే ప్రార్థనలు మరెవరికీ ఎప్పటికీ తెలియకపోయినా, సమస్తాన్ని చూసే దేవుడు మీ హృదయాన్ని, జీవితంలో మీరు సాధించే పవిత్రతను చూస్తాడు.  మీ సొంత శక్తితో మీరు పలకగల మాటలన్నిటికన్నా, చేయగల పనులన్నిటికన్నా ఈ పవిత్రత మరింత ఎక్కువ సాధిస్తుంది.  మీరు ఎన్నుకోబడిన ఆత్మ.  ఆ ధ్యేయాన్ని నెరవేర్చండి; అప్పుడు మీరు దేవుని కారుణ్యానికి శక్తివంతమైన సాధనంగా మారుతారు.

ప్రభువా, పవిత్రత కోసం నన్ను ఎన్నుకున్నందుకు నీకు కృతజ్ఞతలు తెలుపుతున్నాను.  ఈ పిలుపును స్వీకరిస్తున్నాను; నా పూర్ణ హృదయంతో నిన్ను సేవించాలని కోరుకుంటున్నాను.  ప్రియ ప్రభువా, నా జీవితం నీదే; నీ చిత్తప్రకారం నన్ను నడిపించు.  యేసూ, నేను నీపై నమ్మకం ఉంచుతున్నాను.

సామాన్య కాలానికి పవిత్ర గ్రంథ ధ్యానాలు

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు