చిత్రం సౌజన్యం: Pixabay
ఆంగ్లంలో వినండి
మన జీవితపు పిలుపును దైవీకరణకు పిలుపుగా వర్ణించవచ్చు. దీని అర్థమేమిటి? మనలను తన జీవితంలోకే ఆకర్షించడానికి దేవుడు భూమిపైకి వచ్చి, మన మానవ స్వభావాన్ని స్వీకరించారని దీని అర్థం. ఒక విధంగా చెప్పాలంటే, మనం దేవునిగా మారడానికి పిలువబడ్డాము. ఈ “దైవీకరణ” అనే భావన ఇరెనేయుస్, జస్టిన్ మార్టిర్, అతనాసియుస్, అలెగ్జాండ్రియాకు చెందిన క్లెమెంట్, విశుద్ధ అగస్టీను వంటి తొలి శ్రీసభ పితరులలో సాధారణంగా ఉండేది. మన స్వభావం దైవస్వభావంగా మారి, ఆ అర్థంలో మనం దేవునిగా మారాలని కాదు; అలా భావించడం విశ్వాసవిరుద్ధమైన బోధ అవుతుంది. బదులుగా, ఆయన దైవజీవితంలో పాలుపంచుకుంటూ, పరిపూర్ణ ఐక్యతతో ఆయనతో ఏకం కావాలనే అర్థంలో మనం దేవునిగా మారడానికి పిలువబడ్డాము. దేవుడు ఒక మహాసముద్రం, మనం ఆ మహాసముద్రంలో ముంచబడిన ఒక నీటిబిందువు అన్నట్లుగా ఇది ఉంటుంది. మనలను సూచించే ఆ నీటిబిందువులోని నిర్దిష్ట కణాలు ఆ ఒక్క బిందువుగానే ఉన్నప్పటికీ, దేవుణ్ణి సూచించే మహాసముద్రపు జలాలు దానిని తమలో ఇముడ్చుకుంటాయి. మనం దేవునిలో జీవిస్తున్నట్లే దేవుడు మనలో జీవించేంతగా, ఆయనతో మన ఐక్యత సంపూర్ణం కావాలి (చూడండి డైరీ #1289).
దైవీకరణ పొందాలన్న మీ పిలుపును గురించి ధ్యానించండి. ఈ భావన మన క్రైస్తవ పిలుపులోని అంతరార్థాన్ని తెలియజేస్తుంది. ఎందుకంటే, కారుణ్యమయుడైన మన దేవునితో మనం కలిగి ఉండవలసిన గాఢమైన ఐక్యతను ఇది వ్యక్తం చేస్తుంది. మీరు తన జీవితంలో పాలుపంచుకోవాలని, అన్ని విధాలా తనతో ఏకం కావాలని ఆయన కోరుకుంటున్నారు. దీన్ని అర్థం చేసుకోవడం కష్టంగా ఉన్నప్పటికీ, ఇదే మీ పిలుపని మీరు విశ్వాసంతో అంగీకరించాలి. ఈ రోజు ఈ భావనను గురించి ధ్యానించండి. మన ప్రభువుతో ఏకమై, ఆయన జీవితంలోనే పాలుపంచుకోవడానికి మిమ్మల్ని మీరు ఆయనకు సమర్పించుకుంటున్నారని ఆయనతో చెప్పండి.
ప్రభువా, దయచేసి నా దగ్గరకు వచ్చి, నీ పరిపూర్ణ చిత్తానికి, అపార కారుణ్యానికి అనుగుణంగా నన్ను దైవీకరించు. జీవితంలో ఇంత మహిమాన్వితమైన, ఉన్నతమైన పిలుపుకు నన్ను పిలిచినందుకు నీకు కృతజ్ఞతలు తెలుపుతున్నాను. నీవు అందిస్తున్న ఈ ఆహ్వానాన్ని నేను అంగీకరిస్తున్నాను. ప్రియ ప్రభువా, నా జీవితం నీదే. నన్ను రూపాంతరం చేయి, నన్ను పూర్తిగా నీలో లీనం చేసుకో, నీ చిత్తప్రకారం నన్ను మలచుకో. యేసూ, నేను నీపై నమ్మకం ఉంచుతున్నాను.
వ్యాకుల మాతకు నవదిన ప్రార్థన
సంప్రదాయంగా సెప్టెంబర్ 7–15 తేదీలలో ప్రార్థిస్తారు
దైవకారుణ్యంపై మరిన్ని ధ్యానాలు




