తెలుగు

ధ్యానం 179: అంతరంగిక శూన్యతను ఎదుర్కోవడం

అరణ్యంలో పునీత జెరోమ్, చిత్రకారుడు పింటురిక్కియో

వీడియో

ఆంగ్లంలో వినండి

“ప్రభువు ఇస్తాడు, ప్రభువు తీసివేస్తాడు…” (యోబు 1:21).  ఇది ఎంత సత్యమో!  జీవితంలో మనం దేవుని సమృద్ధియైన ఓదార్పును అనుభవించే సమయాలు ఉంటాయి.  కుటుంబంలో గొప్ప ఆనందం కలిగే క్షణాల్లో కావచ్చు, లేదా మరొకరి షరతులులేని ప్రేమను మనం అనుభవించినప్పుడు కావచ్చు.  కొన్నిసార్లు మన ప్రార్థనా జీవితంలో దేవుని శక్తిమంతమైన సాన్నిహిత్యాన్ని అనుభవించి ఆనందంతో నిండిపోతాం.  అయితే జీవితంలో దేవుడు దూరంగా ఉన్నట్లు, మన ఆత్మలు శూన్యంగా ఉన్నట్లు అనిపించే క్షణాలు కూడా ఎన్నో ఉంటాయి.  దీని గురించి చింతించకండి.  ఇది పాపం వల్ల కలిగితే, ఆ పాపాన్ని ఎదుర్కొని, పాపసంకీర్తనం చేసి, ముందుకు సాగండి.  కానీ ఇది ఏ పాపం వల్లా కలగకపోతే, మీకు ఎలా అనిపిస్తున్నా సరే, మీ విశ్వాసాన్నీ దేవునిపై మీ ప్రేమనూ మరింత ప్రగాఢం చేసుకోవడానికి ఇది మీకు ఒక అవకాశమని తెలుసుకోండి.  ఇది నిజమైన కృప. మన అంతరంగంలో అనుభూతులు చాలా స్వల్పంగా ఉన్నప్పుడు కూడా మనలను విశ్వాసానికి పిలిచేంతగా దేవుడు మనలను ప్రేమిస్తున్నందుకు మనం కృతజ్ఞులమై ఉండాలి (చూడండి దినచర్య #943).

ప్రస్తుతం మీ ఆత్మలో మీరు ఏమి అనుభవిస్తున్నారు?  దేవుని సాన్నిహిత్యాన్ని మీరు అనుభవిస్తున్నారా? ఆ సాన్నిహిత్యం మీకు గొప్ప ఓదార్పునిస్తోందా?  లేక దేవుడు మీకు మరుగై ఉన్నట్లు, మీ అంతరంగం ఎండిపోయి శూన్యంగా ఉన్నట్లు అనిపిస్తోందా?  ప్రతి అనుభవంలోనూ మనం ఆనందించాలి; ప్రతి క్షణానికీ మనకు అవసరమైన కృపను దేవుడు అందిస్తాడని తెలుసుకోవాలి.  మీకు ఎలా అనిపించినా, ఈ రోజు మీ విశ్వాసాన్ని పునరుద్ధరించుకోండి.  ముఖ్యంగా ఎంతో అంతరంగిక శూన్యతను అనుభవించే క్షణాల్లో అలా చేయండి.  ఆ క్షణాల్లో మీరు చేసే విశ్వాస ప్రకటన, మీరు గ్రహించగలిగిన దానికంటే ఎక్కువగా, మీకూ లోకానికీ దేవుని కారుణ్య ద్వారాలను తెరుస్తుంది.

ప్రభువా, ఇప్పుడూ ఎల్లప్పుడూ నేను నిన్ను ప్రేమిస్తున్నాను; నాకు ఎలా అనిపించినా నీ పట్ల నా ప్రేమను పునరుద్ధరించుకుంటున్నాను.  మంచి సమయాల్లోనూ కష్టకాలాల్లోనూ నిన్ను ప్రేమించాలని, నీయందు విశ్వాసం కలిగి ఉండాలని, నీపై నమ్మకం ఉంచాలని నేను ఎంచుకుంటున్నాను.  నీవు ఓదార్పునకూ అంతరంగిక శూన్యతకూ దేవుడవు.  ఏమి జరిగినా నేను నిన్నే ఎంచుకుంటున్నాను.  యేసూ, నేను నీపై నమ్మకం ఉంచుతున్నాను.

జూలై 28 – పునీత ఇరెనేయుస్, పీఠాధిపతి మరియు వేదసాక్షి
ఈ సంవత్సరం ఆదివారం నాడు రావడం వల్ల దీనిని ప్రార్థనాక్రమ స్మరణదినంగా జరుపుకోరు

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు