పునీత పౌలు దివ్యపారవశ్యం — చిత్రకారుడు: నికోలస్ పూస్సిన్
ఆంగ్లంలో వినండి
ప్రేమలో పడటం ఒకరిని “మంత్రముగ్ధులను” చేయవచ్చు. ఈ విధమైన మానవ ప్రేమ కొంతవరకు మిమ్మల్ని మాటలు రాకుండా చేయవచ్చు; మీ అనుభూతిని కచ్చితంగా వ్యక్తపరచడం అవసరమని గానీ, అసలు సాధ్యమని గానీ మీకు అనిపించకపోవచ్చు. కానీ దేవుని ప్రేమ మానవ ప్రేమకు సంబంధించిన ఏ అనుభవానికైనా అతీతమైనది. అందువల్ల, దానిని గాఢంగా అనుభవించినప్పుడు, మీరు ప్రేమించే దేవుని పట్ల భక్తివిస్మయాలతో మౌనంగా కూర్చుండిపోతారు. మీరు ప్రేమించడానికి ఆకర్షితులైన దేవుని మహిమావైభవాలను చూసి మీలో కలిగే అబ్బురాన్ని, ఆశ్చర్యాన్ని ఏ మాటలూ పూర్తిగా వర్ణించలేవు, వ్యక్తపరచలేవు. మరే విధంగానైనా మీరు మాటల్లో చెప్పగలిగే దానికంటే మీ మౌనం, భక్తివిస్మయం ఎంతో ఎక్కువగా తెలియజేస్తాయి (చూడండి దినచర్య #729).
మీరు ప్రేమలో పడ్డారా? మరింత స్పష్టంగా చెప్పాలంటే, మీరు మీ దేవుని ప్రేమలో పడ్డారా? దేవుని విషయంలో “ప్రేమలో పడటం” అంటే కేవలం మానవ సహజమైన తపన లేదా భావోద్వేగం మాత్రమే కాదు; అది మీ ఆత్మను పూర్తిగా ఆవరించి, ఆయన సన్నిధిలో మీకు తృప్తినిచ్చే ఆధ్యాత్మిక ఆకాంక్ష. జీవితంలో పరిపూర్ణతను పొందడానికి దేవునితో ఈ ఆధ్యాత్మిక ఐక్యతను అనుభవించడం ఒక్కటే మీకు అవసరం. అదే మీ జీవితంలోని ప్రతి పనికీ మూలమవుతుంది; ఎందుకంటే మీ కార్యాలన్నీ మీ ప్రియతముడైన దేవుని ప్రేమించడం వైపు మాత్రమే మళ్లుతాయి. దేవుని పట్ల మీ ప్రేమ ఎంత లోతైనదో ధ్యానించండి. ఈ ప్రేమ మీ జీవితంలో సజీవంగా కనిపించకపోతే, మీరు దానిని కోరుకుంటున్నారని ప్రభువుతో చెప్పి, మీ శక్తినంతా వినియోగించి ఆయనను వెదకండి.
ప్రభువా, నేను నిన్ను ప్రేమిస్తున్నాను; నీ ప్రేమను పొందాలని కోరుకుంటున్నాను. నా ప్రేమ పరిపూర్ణతకు ఎంతో దూరంగా ఉందని నాకు తెలుసు. ప్రభువా, మరింత సన్నిహితంగా నిన్ను వెదకడానికి, అత్యంత ఆంతరంగికంగా నిన్ను కలుసుకోవడానికి నాకు సహాయం చేయుము. నా ఆత్మ నీ కోసం తపనతో నిండిపోవుగాక; నేను నిన్ను కలుసుకున్నప్పుడు నీ మహిమావైభవాలను తిలకించుదును గాక. నా దేవా, నీ పట్ల నాకున్న ప్రగాఢమైన విస్మయంలో నేను నిజంగా “లీనమైపోవుదును” గాక. యేసూ, నేను నీపై నమ్మకం ఉంచుతున్నాను.
మే 25 – సభమాతయైన ధన్య కన్య మరియ జ్ఞాపకార్థ దినం
దైవకారుణ్యంపై మరిన్ని ధ్యానాలు




