తెలుగు

ధ్యానం 189: భయాన్ని అధిగమించడం

చిత్రం: అన్‌స్ప్లాష్ ద్వారా

వీడియో

ఆంగ్లంలో వినండి

వివిధ కారణాల వల్ల భయం కలుగుతుంది.  ఏదైనా తక్షణ ప్రమాదాన్ని గుర్తించినప్పుడు, ఒక రకమైన రక్షణ ప్రతిస్పందనగా అకస్మాత్తుగా భయం కలుగుతుంది.  ఉదాహరణకు, ఒక కారు అకస్మాత్తుగా మీరు వెళ్తున్న దారిలోకి దూసుకురావడమే ఆ తక్షణ ప్రమాదమైతే, ఈ భయం నిజంగానే మీ ప్రాణాన్ని కాపాడగలదు.  అకస్మాత్తుగా కలిగే భయం మీరు వెంటనే చర్య తీసుకొని, ఢీకొనకుండా తప్పించుకునేలా చేస్తుంది.  అయితే, మన క్షేమానికి ముప్పుగా మనం భావించే, అంత తక్షణమైనవి కాని ఇతర కారణాల వల్ల కూడా భయం కలగవచ్చు.  ఉదాహరణకు, ఆర్థిక మాంద్యం గురించిగానీ, వ్యాపారంలో లాభం తగ్గిపోవడం గురించిగానీ ఎవరైనా భయంతో సతమతమవుతుండవచ్చు.  “నా కుటుంబాన్ని ఎలా పోషించగలను?” అనే భయం ఉండవచ్చు.  లేదా ఎవరికైనా ఆరోగ్య సమస్యలు ఉండవచ్చు; వాటివల్ల భవిష్యత్తు గురించి భయం పెరుగుతూ ఉండవచ్చు.  ఇలా ఎన్నో కారణాలను చెప్పుకుంటూ పోవచ్చు.  కొన్ని రకాల భయాలు మేలు చేసేవే అయినా (కారు ప్రమాదాన్ని తప్పించుకోవడానికి పక్కకు మళ్లడం వంటివి), మిగిలినవాటిలో చాలా వరకు అలాంటివి కావు.  ముఖ్యంగా, భయం ఆందోళనను, చింతను కలిగించి, దేవునిపైనా ఆయన దైవపరిపాలనపైనా నమ్మకాన్ని కోల్పోయేలా చేసినప్పుడు, అది ఒక సమస్య అవుతుంది.  కానీ దేవుడు మీ హృదయంలో సజీవంగా ఉంటూ, అక్కడ నివసిస్తూ పరిపాలిస్తుంటే, మనం ఎదుర్కొనే ప్రతి పోరాటం మధ్యలోనూ ఆయన సాన్నిధ్యం మానవ శక్తికి మించిన ఆత్మస్థైర్యాన్ని, నమ్మకాన్ని కలిగిస్తుంది (డైరీ #1001 చూడండి).

ప్రస్తుతం మీరు పోరాడుతున్న నిర్దిష్టమైన భయం గురించి ధ్యానించండి.  మితిమీరిన చింతను, ఆందోళనను కలిగిస్తున్నది ఏమిటి?  అది ఏదైనా సరే, మీరు తనపై నమ్మకం ఉంచాలని ప్రభువు కోరుకుంటున్నారు.  అవును, ఒక రకమైన “పవిత్రమైన” భయం అన్ని పరిస్థితులనూ సరిగ్గా అంచనా వేసి, శ్రద్ధతోనూ బాధ్యతతోనూ వ్యవహరించడానికి మనకు తోడ్పడగలదు. అయితే, చాలా తరచుగా మనం నిజంగా పోరాడుతున్నది దేవునిపై నమ్మకం లేకపోవడంతోనే.  మీ భయాన్ని, మీ నమ్మకాన్ని గురించి ధ్యానించి, క్రీస్తును మీ హృదయంలోకి మరింత లోతుగా ఆహ్వానించండి. అప్పుడు ఆయన సాన్నిధ్యం వ్యర్థమైన భయాలన్నిటినీ తొలగించి, ఆయన సంరక్షణలోనూ, దైవపరిపాలనలోనూ, కారుణ్యంలోనూ మీరు సంపూర్ణంగా నమ్మకం ఉంచేలా చేస్తుంది.

ప్రభువా, నేను నిజంగా నీపై నమ్మకం ఉంచుతున్నాను.  నీపై మరింతగా నమ్మకం ఉంచడానికి నాకు సహాయం చేయుము.  నన్ను భయానికి లోనుచేసే వాటన్నిటినీ నీకు సమర్పిస్తున్నాను.  నీ పరిపూర్ణ ప్రేమపై నమ్మకం ఉంచుతున్నాను; నా జీవితంలో నీ కారుణ్యంపైనే సంపూర్ణంగా ఆధారపడాలని కోరుకుంటున్నాను.  ప్రియమైన ప్రభువా, నా జీవితం నీదే. నీ చిత్తప్రకారం నాతో వ్యవహరించుము, ఎల్లప్పుడూ నన్ను నడిపించుము.  యేసూ, నేను నీపై నమ్మకం ఉంచుతున్నాను.

సామాన్య కాలానికి పవిత్ర గ్రంథ ధ్యానాలు

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు