తెలుగు

ధ్యానం 206: ఆధ్యాత్మిక సంపదను దాచుకోవడం

జాన్ స్టీన్ చిత్రించిన ధనవంతుడు మరియు లాజరు ఉపమానం

వీడియో

ఆంగ్లంలో వినండి

ఆధ్యాత్మిక జీవితానికి ఎదురయ్యే ఒక నిజమైన ప్రమాదాన్ని “ఆధ్యాత్మిక సంపదను దాచుకోవడం” అని పిలవవచ్చు.  ఇలాంటి వ్యక్తి తానే దైవకారుణ్యానికి గమ్యంగా మారాలని ప్రయత్నిస్తారే తప్ప, దైవకారుణ్యానికి ఒక సాధనంగా మారాలని కోరుకోరు.  దైవకారుణ్యానికి తానే గమ్యంగా ఉండాలని ప్రయత్నించడం ద్వారా, ఆ వ్యక్తి ఆధ్యాత్మికంగా దురాశకు లోనై, సొంత ప్రయోజనం కోసమే ఆధ్యాత్మిక విషయాలను కోరుకుంటారు.  ఇది ఒక రకమైన గర్వం.  ప్రార్థన చేయడం అనేది పవిత్రంగా “కనిపించడానికి” చేసే పనిగా మారుతుంది.  ఇతరులు చూడాలనే ఉద్దేశంతో మంచి పనులు చేస్తారు.  జ్ఞానం, పాండిత్యం ఉన్నట్లు కనిపించడానికి ఎన్నో ఆధ్యాత్మిక పుస్తకాలను కూడబెట్టుకోవాలని కూడా కోరుకోవచ్చు.  అయితే దేవుని కారుణ్యపు ముఖ్యమైన లక్ష్యం “ఆధ్యాత్మిక సంపదను దాచుకోవడం” కాదు; “ఆధ్యాత్మిక ఔదార్యం.”  నిజమైన కారుణ్యం మన జీవితాల్లోకి ప్రవహించాలని కోరుకుంటే, మనం దానిని ఇతరులకు పంచాలి.  దేవుడు మనకు ఇచ్చే ప్రతిదానినీ ఇతరులకు పంచాలనే ఉద్దేశంతో ఇచ్చిన వరంగా చూడాలి.  అందువల్ల, దేవుడు మీకు ఒక ప్రత్యేక కృపను ఇచ్చినప్పుడు, మరొకరి అభివృద్ధికి ఈ వరాన్ని ఎలా ఉపయోగించవచ్చనేదే మొదట మీ మనసులోకి రావాలి.  దేవుని కారుణ్యాన్ని ఇతరులకు పంచడం ద్వారా మనం అంతకంతకూ సంపన్నులమవుతాం; ఆధ్యాత్మిక ఔదార్యంతో చేసే ఈ పని మన జీవితాల్లో దేవుని కారుణ్యాన్ని నిరంతరం పెంచుతుందని గ్రహిస్తాం (చూడండి దినచర్య #1069).

మీరు పవిత్రతను కోరుకుంటున్నారా?  అలా అయితే, ఎందుకు?  మిమ్మల్ని ప్రేరేపించేది ఏమిటి?  ఇతరులకు మంచిగా కనిపించడానికా?  లేక మీరు నిజంగా మంచివారై, అవసరంలో ఉన్నవారికి దేవుని మంచితనాన్ని పంచడానికా?  మీ జీవితంలో దేవుని కారుణ్యం కలిగించే అంతిమ ఫలితాన్ని గురించి ధ్యానించండి.  దేవుడు మీకు ఇచ్చే వాటన్నిటి అంతిమ ఫలితం ఆయన కారుణ్యాన్ని ఇతరులకు ఉదారంగా పంచడమే అయ్యేలా మార్గాలను వెదకండి.  ఇలా చేయడం ద్వారా మీరు కూడా సమృద్ధిగా ఆశీర్వదించబడతారు.

అనంత కారుణ్యంగల ప్రభువా, నీ కృపను ఎంత ఎక్కువగా పంచితే అంత ఎక్కువగా అది వృద్ధి చెందుతుందని గ్రహించడానికి నాకు సహాయం చేయుము.  ఎల్లప్పుడూ నీ కారుణ్యానికి పవిత్రమైన సాధనంగా ఉండటానికి, ఈ ఔదార్య కార్యం ద్వారా నీ ఉదార హృదయపు సమృద్ధిని పొందటానికి నాకు సహాయం చేయుము.  యేసూ, నేను నీపై నమ్మకం ఉంచుతున్నాను.

జూలై 25 – అపొస్తలుడైన పునీత యాకోబు పండుగ

 

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు