తెలుగు

ధ్యానం 308: తల్లి ప్రేమ

మేల్కొలుపు, చార్ల్స్ జలాబెర్ట్ చిత్రకృతి

వీడియో

ఆంగ్లంలో వినండి

ఈ లోకంలోని ఏ రూపమూ దేవుని పరిపూర్ణ ప్రేమను పూర్తిగా వెల్లడించలేదన్నది నిజం.  దేవుడు సమస్తానికీ అతీతుడు; ఆయన ప్రేమ ఈ లోకంలో ఇమడలేనంత గొప్పది.  అయినప్పటికీ, ఈ లోకంలోని అనేక విషయాలు దేవుని ప్రేమలోని వివిధ అంశాలను వెల్లడిస్తాయి.  అలాంటి ఒక రూపం తల్లి ప్రేమ.  దేవుడు మనకు పరలోక తండ్రిగా వెల్లడించబడ్డారు, దేవుని కుమారుడు పురుషునిగా వచ్చారు. అయినప్పటికీ, తల్లి ప్రేమ ద్వారా దేవుని ప్రేమ గురించి మనం ఎంతో తెలుసుకోవచ్చు.  నిజానికి, దేవుడు మన పట్ల అత్యంత వాత్సల్యంగల తల్లివలె ఉంటారని అర్థం చేసుకోవడం కూడా సముచితమే.  మాతృత్వం పవిత్రమైనది, ఎందుకంటే అది మానవాళి కోసం దేవుడు చేసిన సహజమైన ఏర్పాటులో భాగం.  తన బిడ్డ పట్ల అచంచలమైన నిబద్ధతతో కూడిన గాఢమైన ప్రేమను ఆయన తల్లి హృదయంలో ఉంచుతారు.  మన ధన్యమాత తప్ప మరే తల్లీ పరిపూర్ణురాలు కాకపోయినా, దేవుణ్ణి అర్థం చేసుకోవడానికి తల్లి ప్రేమను ఆధారంగా తీసుకునేటప్పుడు ఆ ప్రేమలోని సౌందర్యాన్ని చూడటం మంచిది.  తల్లిలోని వాత్సల్యం, షరతులులేని స్వీకారం దేవుని ప్రేమను వెల్లడించే రెండు విశిష్ట అంశాలు.  దేవుడు నిజంగా మిమ్మల్ని పరిపూర్ణమైన మాతృప్రేమతో ప్రేమిస్తున్నారు.  ఆయన ప్రేమ గురించి సాధారణంగా ఇలా మాట్లాడకపోయినా, సృష్టి ద్వారా కలిగే ఈ సుందరమైన ప్రకటనను ధ్యానించడం ఎంతో ప్రయోజనకరం (చూడండి దినచర్య #1490).

మీరు దేవుణ్ణి ఎలా చూస్తారు?  దేవుని గురించి మీ మనసులో ఉన్న రూపాన్ని ధ్యానించండి; ముందుగా పవిత్ర గ్రంథంలోని వివిధ చిత్రణలను ఆధారంగా చేసుకోండి.  అయితే దేవుడు తన ప్రేమను తెలియజేసే అనేక సహజమైన మార్గాలను కూడా ధ్యానించండి.  ఈ రోజు, ముఖ్యంగా అప్పుడే పుట్టిన తన శిశువు పట్ల తల్లికి ఉండే ప్రేమను ధ్యానించండి.  ఆ తల్లికి తన శిశువు పట్ల ఉండే ప్రత్యేకమైన, బలమైన మమకారాన్ని, ఆమె అచంచలమైన నిబద్ధతను మననం చేసుకోండి.  ప్రభువు మిమ్మల్ని అంతకంటే అనంతంగా ఎక్కువగా ప్రేమిస్తున్నారు.  ఈ ప్రేమలో ఎల్లప్పుడూ ఓదార్పు పొందండి.

ప్రభువా, పరిపూర్ణమైన ప్రేమతో నన్ను ప్రేమిస్తున్నందుకు నీకు కృతజ్ఞతలు.  మాతృత్వమనే వరం కోసం, ఈ వరం ద్వారా నా పట్ల నీకున్న షరతులులేని వాత్సల్యపూరిత ప్రేమను వెల్లడిస్తున్నందుకు నీకు కృతజ్ఞతలు.  ఈ ప్రేమను ఎల్లప్పుడూ తెలుసుకోవడానికి, శిశువు తన తల్లిని వెదకినట్లు నిన్ను వెదకడానికి నాకు సహాయం చేయి.  యేసూ, నేను నీపై నమ్మకం ఉంచుతున్నాను.

నవంబరు 4 – బిషప్పు పునీత చార్ల్స్ బొర్రొమేయో స్మరణ

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు