తెలుగు

ధ్యానం 119: అంతరంగ, బాహ్య ఆత్మనిగ్రహ సాధనలు

దేవదూతల గానబృందం తన మధుర గానాలతో పునీత ఫ్రాన్సిస్ దుఃఖాలను దూరం చేస్తుంది. చిత్రకారుడు: జోసే బెన్‌ల్యూరే ఇ గిల్

వీడియో

ఆంగ్లంలో వినండి

ఈ లోకంలోని గతించిపోయే విషయాలపట్ల మరింత అనాసక్తిని పెంపొందించుకోవడానికి స్వీయ సంకల్పాన్ని నిరాకరించే సాధనే ఆత్మనిగ్రహం.  దేవునిపట్ల, ఆయన పవిత్ర చిత్తంపట్ల తప్ప మరి దేనిపట్లా మమకారం లేకుండా ఉండటానికి మనం కృషి చేయాలి.  మనకు నచ్చినవన్నీ లేదా మనం కోరుకునేవన్నీ చెడ్డవని కాదు; అయితే మనం నిజమైన పవిత్రతను కోరుకుంటే, దేవుని కోసం మనకున్న ఆకాంక్ష మన ఇతర కోరికలన్నింటినీ రూపాంతరం చేసి, వాటన్నింటినీ నడిపించాలి.  మన సొంత ఆలోచనలను లేదా సంకల్పాన్ని నిరాకరించే పద్ధతులు అంతరంగ ఆత్మనిగ్రహంలో భాగం.  ఉదాహరణకు, మనకు ఇష్టం లేకపోయినా దయతో ఒక మాట పలకడం, లేదా మౌనంగా ఉండటం కష్టమైనప్పుడు నాలుకను అదుపులో ఉంచుకోవడం.  మనకు నచ్చిన ఆహారాన్ని మానుకోవడం లేదా తపస్సుకాలంలోనూ, ఏడాది పొడవునా కొన్ని విషయాలను త్యజించడం వంటి సాధనలు బాహ్య ఆత్మనిగ్రహంలో భాగం.  దేవునితో మీ సంబంధాన్ని మీరు నిజంగా ప్రాముఖ్యంగా భావిస్తే, ఈ సాధనలు ఆధ్యాత్మిక జీవితానికి అత్యవసరం (చూడండి: దినచర్య #565).

మీరు దేనిపట్ల ఎక్కువగా మమకారం కలిగి ఉన్నారు?  ఏది మిమ్మల్ని ఎక్కువగా అదుపు చేస్తూ, మీ కోరికలను నడిపిస్తున్నట్లు అనిపిస్తోంది?  అది పాపం వైపు మొగ్గు కావచ్చు, లేదా సహజమైన ఏదైనా అభిరుచిపట్ల మక్కువ కావచ్చు.  పాపం వైపు మీ మొగ్గులతో ప్రారంభించి, ఆ పాపాలను అధిగమించేంత బలాన్ని పొందడానికి మీ కోరికలను నిగ్రహించుకునే మార్గాలను వెదకండి.  మీ సహజమైన మక్కువలను, ఇష్టాలను కూడా పరిశీలించండి.  అప్పుడప్పుడు, కొంతవరకు వీటిని స్వచ్ఛందంగా త్యాగం చేయాలని ఎంచుకోవడం పవిత్రతలో ఎదగడానికి మేలైన, పవిత్రమైన మార్గం.  ఇలా చేయడానికి మార్గాలను వెదకండి; అప్పుడు దేవుని కారుణ్యం మరింత సమృద్ధిగా ప్రవహిస్తుంది.

ప్రభువా, ఇతర కోరికలన్నింటికన్నా మిన్నగా నిన్ను మాత్రమే కోరుకోవాలని నేను ఆశిస్తున్నాను.  నన్ను శుద్ధి చేసి, ఈ జీవితంలోని నా అనేక మమకారాల నుండి నాకు విముక్తి కలిగించు.  నీ కారుణ్యాన్ని స్వీకరించడానికి నా మనస్సు, సంకల్పం మరింత సిద్ధంగా ఉండేలా, ప్రతిరోజూ నీకు త్యాగాలు అర్పించే ధైర్యాన్ని నాకు ప్రసాదించు.  యేసూ, నేను నీపై నమ్మకం ఉంచుతున్నాను.

ఏప్రిల్ 29 – సియెనా పునీత కతరీన, కన్య, సభ పండితురాలు—స్మరణ దినం

పాస్కా కాల ప్రార్థనలు

పాస్కా కాలానికి పవిత్ర గ్రంథ ధ్యానాలు

దైవకారుణ్యంపై మరిన్ని ధ్యానాలు

దైనందిన సువార్త ధ్యానాలు

నేటి పునీతులు/పండుగలు