اردو

غور و فکر 62: زندگی کی چھوٹی چھوٹی قربانیاں

گیورگ فریڈرِش شٹیٹنر († 1639) سے منسوب، بہ ذریعہ ویکی میڈیا کامنز

ویڈیو

کیا چھوٹی چھوٹی قربانیاں اہم ہیں؟ کبھی کبھی ہمیں لگتا ہے کہ ہمیں بڑے کام کرنے کی کوشش کرنی چاہیے۔ کچھ لوگ عظمت کے خیال باندھتے ہیں اور بڑے کارنامے انجام دینے کے خواب دیکھتے ہیں۔ لیکن اُن چھوٹی چھوٹی قربانیوں کا کیا جو ہم روز ایک ہی طرح کے کام کرتے ہوئے دیتے ہیں؟ مثلاً صفائی کرنا، کھانا پکانا، کسی کی مدد کرنا، معاف کرنا وغیرہ؟ کیا چھوٹے چھوٹے کام اہم ہیں؟ یقیناً۔ یہ ایسا خزانہ ہیں جو ہم خدا کو پیش کرتے ہیں اور جس کی کوئی مثال نہیں۔ روزمرہ کی چھوٹی قربانیاں کھلی وادی کے اُس میدان کی مانند ہیں جس میں حدِ نگاہ تک خوب صورت جنگلی پھول کھلے ہوں۔ ایک پھول بھی دل کش ہوتا ہے، لیکن جب ہم ہر روز، دن بھر محبت کے یہ چھوٹے چھوٹے کام کرنے کا عزم کرتے ہیں، تو ہم خدا کو ایسا لہلہاتا میدان پیش کرتے ہیں جس کے حسن و شکُوہ کی کوئی انتہا نہیں (دیکھیے ڈائری #208)۔

آج چھوٹی چھوٹی باتوں پر غور کریں۔ آپ روزانہ کون سا ایسا کام کرتے ہیں جو آپ کو تھکا دیتا ہے اور اکتا دینے والا یا غیر اہم لگتا ہے؟ جان لیجیے کہ یہی کام، شاید دوسرے سب کاموں سے بڑھ کر، آپ کو ایک شاندار موقع دیتے ہیں کہ آپ نہایت عمدہ طریقے سے خدا کی تعظیم کریں اور اُس کا جلال ظاہر کریں۔

اے خداوند، میں اپنا دن تیرے حضور پیش کرتا ہوں۔ میرا ہر کام اور میرا سارا وجود تیرے حضور نذر ہے۔ خاص طور پر وہ چھوٹے چھوٹے کام تیرے حضور پیش کرتا ہوں جو میں ہر روز کرتا ہوں۔ میرا ہر کام تیرے لیے ایک نذرانہ بن جائے، تاکہ دن بھر تجھے عزت و جلال ملے۔ اے یسوع، مجھے تجھ پر بھروسا ہے۔

بارہویں دن کے مراقبے:
بیابان میں 40 دن & صلیب کے پاس 40 دن

ایامِ روزہ کے لیے مواد

3 مارچ – مقدسہ کیتھرین ڈریکسل، کنواری

رحمتِ الٰہی پر مزید تأملات

روزانہ انجیل پر تأملات

آج کے مقدسین اور عیدیں