मराठी

चिंतन 237: श्रद्धेचा अंधार आपले प्रेम शुद्ध करतो

न्हेयोब, CC BY-SA 4.0, विकिमीडिया कॉमन्समार्फत

व्हिडिओ

संत फॉस्टिना यांच्यासह अनेक थोर संतांनी देवाशी असलेल्या आपल्या नात्यात अंतरीचा अंधार अनुभवला. हा अनुभव खरोखरच गूढ आहे. आत्मा जसजसा देवाच्या अधिक जवळ येतो, तसतसे या वाटचालीत त्याला अनेक प्रकारचे सांत्वन मिळते आणि प्रेमाची अनुभूती येते. पण आध्यात्मिक वाटचालीत एक असा टप्पा येतो, जेव्हा देव स्वतःला लपवतो. त्या व्यक्तीने काही पाप केले म्हणून असे घडत नाही. उलट, त्या व्यक्तीच्या जीवनात अधिक खोलवर प्रवेश करून, भावनिक किंवा आध्यात्मिक सांत्वनाचाही आधार नसताना तिला सावरण्याची ही देवाची रीत आहे. आत्मा अशा अंधारात बुडून जातो, जो फार वेदनादायक ठरू शकतो. पण या अंधारात, एका नव्या प्रकारच्या मौनात आणि समर्पणात देवाला जाणून घेण्याचे आमंत्रण त्या व्यक्तीला मिळते. या नव्या पातळीवर देव आत्म्याशी जो संवाद साधतो, तो शब्दांच्या आणि मानवी अनुभवाच्या पलीकडचा असतो. आत्म्याला देवाची आणि त्याच्या दैवी इच्छेची जाणीव असते, पण देवाची अनुभूती येत नाही. कोणत्याही भावना जाणवत नसतानाही आणि आध्यात्मिक सांत्वन मिळत नसतानाही देवाला आणि त्याच्या इच्छेला निवडण्याचे आमंत्रण या अंधारातून आत्म्याला मिळते (पाहा दैनंदिनी #1235).

बहुधा तुमच्या प्रार्थनेच्या जीवनात तुम्हाला अजून या अंधाराचा अनुभव आलेला नसेल. देवाशी असलेल्या इतक्या गाढ ऐक्यापर्यंत मोजकेच लोक पोहोचतात. तरीही या अवस्थेविषयी जाणून घेणे आणि थोर संतांना आलेला अनुभव समजून घेणे चांगले आहे. ही पवित्रतेची वाट आहे हे समजल्यावर, देवाचे प्रेम अनुभवण्याची इच्छा बाजूला ठेवून तुम्ही खुद्द देवाची आस धरू शकाल. देव म्हणजे एखादी भावना नव्हे; तो तीन दैवी व्यक्तींचे त्रैक्य आहे. तुम्हाला काहीही जाणवत असले तरी त्याच्यावर प्रेम करण्याचा प्रयत्न करा. मग त्याच्याशी असलेले तुमचे नाते तुमच्या कल्पनेपेक्षाही अधिक गहिरे होईल.

हे प्रभू, माझ्यावरचे तुझे परिपूर्ण प्रेम कधीकधी मला समजत नाही. तुझी जवळीक जाणवते तेव्हा त्या अनुभवाबद्दल मी मनापासून तुझे आभार मानतो. पण तुझे सान्निध्य जाणवत नसतानाही तुझ्यावर प्रेम करण्याची कृपा मला दे, अशी मी प्रार्थना करतो. हे प्रिय प्रभू, माझी श्रद्धा शुद्ध कर. हे येशू, माझा तुझ्यावर विश्वास आहे.

संत मोनिकाची नोव्हेना
(विशेषतः भरकटलेल्या मुलांसाठी केली जाणारी प्रार्थना)
18–26 ऑगस्ट

25 ऑगस्ट – संत लुई, राजा—ऐच्छिक स्मरण

कालासांझचे संत योसेफ, याजक—ऐच्छिक स्मरण

दैवी दयेवरील आणखी चिंतने

सुवार्तेवरील दैनंदिन चिंतन

आजचे संत व सण