मराठी

चिंतन 215: निवडीचे स्वातंत्र्य

येशूचे पवित्र हृदय, कलाकार: लॉरेन्स ओपी, CC BY-NC-ND 2.0.

व्हिडिओ

एका अर्थाने असे म्हणता येईल की, संपूर्ण अंतःकरणाने त्याच्याकडे वळण्याचे आणि त्याची दया स्वीकारण्याचे बंधन देव आपल्यावर घालतो. त्याची दया इतरांपर्यंत पोहोचवण्याचे बंधनही तो आपल्यावर घालतो. पण हे काही सर्वसाधारण ‘बंधन’ नाही, हे आपण समजून घेतले पाहिजे. हे प्रेमाचे बंधन आहे. म्हणजेच, हे बंधन तो खरे तर आपल्यावर लादत नाही. ते स्वीकारण्याचे किंवा नाकारण्याचे पूर्ण स्वातंत्र्य देव आपल्याला देतो. त्यासाठी कोणतीही अट नाही, कोणत्याही प्रकारची सक्ती नाही. उलट, देवाची दया स्वीकारायची की नाही आणि ती इतरांना द्यायची की नाही, हे ठरवण्याचे पूर्ण स्वातंत्र्य आपल्याला आहे. हे स्वातंत्र्य आपल्या जीवनासाठी तसेच देवाच्या दयेच्या देणगीसाठी अत्यावश्यक आहे. देव आपल्याला हे स्वातंत्र्य देतो म्हणूनच या देणगीला आपण पूर्णपणे प्रतिसाद देऊ शकतो, कारण दया स्वेच्छेने दिली गेली पाहिजे आणि स्वेच्छेने स्वीकारली गेली पाहिजे. तसे नसेल, तर ती दयाच नाही. प्रभूने तुम्हाला दिलेल्या स्वातंत्र्याबद्दल कृतज्ञ राहा आणि त्या स्वातंत्र्याचा उपयोग एक गौरवशाली निवड करण्यासाठी करा (पाहा दिनदर्शिका #1115).

देवाने तुम्हाला दिलेल्या या दोन देणग्यांवर आज चिंतन करा. प्रथम, स्वातंत्र्याच्या देणगीवर चिंतन करा. इच्छास्वातंत्र्य असल्यामुळे जीवनात तुम्ही स्वतःचे निर्णय घेऊ शकता. त्यामुळे तुम्ही घेतलेल्या निर्णयांचे आशीर्वादही तुम्हाला लाभतात किंवा त्यांचे दुष्परिणामही तुम्हाला भोगावे लागतात. आपल्या दयेची विपुल देणगी स्वीकारण्यास आणि ती इतरांपर्यंत पोहोचवण्यास देव तुम्हाला आमंत्रण देतो, यावरही चिंतन करा. ही देणगी तुम्ही स्वेच्छेने स्वीकारता, तेव्हा विश्वाच्या देवाला त्याच्या कृपेच्या सिंहासनावरून उतरून तुम्हाला निर्मळ प्रेमाने मिठीत घेण्याचे आमंत्रण देता. त्यामुळे तुम्हीही इतरांना त्याच प्रेमाने मिठीत घेऊ शकता.

हे प्रभू, मी माझे जीवन तुला अर्पण करतो आणि तुझ्या परमपवित्र हृदयातून मिळणारी दया पूर्णपणे स्वीकारण्याची निवड स्वेच्छेने करतो. तुला जे काही मला द्यायचे आहे ते स्वीकारण्यास आणि तुला जे काही इतरांना द्यायचे आहे ते त्यांना देण्यास मला तत्पर ठेव. हे प्रभू, स्वातंत्र्य आणि दया या गौरवशाली देणग्यांसाठी मी तुझे आभार मानतो आणि संपूर्ण अंतःकरणाने तुझ्या दयेचा स्वीकार करतो. हे येशू, माझा तुझ्यावर विश्वास आहे.

सामान्य काळासाठी पवित्र शास्त्रावरील चिंतन

दैवी दयेवरील आणखी चिंतने

सुवार्तेवरील दैनंदिन चिंतन

आजचे संत व सण