प्रतिमेचा स्रोत: stjohnpaul.org/mercy
दोन गोष्टींचा एकत्र विचार केला तर आश्चर्य वाटते. पहिली गोष्ट अशी की, दरवर्षी ईस्टरच्या दुसऱ्या रविवारी दैवी दयेचा सण साजरा करण्याची अधिकृत घोषणा व्हावी आणि तो सण साजरा केला जावा, अशी आपली इच्छा असल्याचे येशूने संत फॉस्टिनाला वारंवार सांगितले आणि तिने ते ऐकले. मठात एकांतवासात राहणाऱ्या या साध्या धर्मभगिनीला जगभरच्या ख्रिस्तसभेसाठी असे काम कसे साधणार होते? दुसरी गोष्ट अशी की, 2000 साली दैवी दयेच्या रविवारी संत जॉन पॉल द्वितीय यांनी फॉस्टिनाला संत म्हणून घोषित केले. त्याच दिवशी आपल्या परमपवित्र पित्यांनी दैवी दयेचा रविवार हा जगभरच्या ख्रिस्तसभेचा सण म्हणून साजरा केला जाईल, अशी अधिकृत घोषणा केली. 1931-1938 या काळात शांततेत आणि एकांतात देवाने ही गोष्ट संत फॉस्टिनाच्या अंतःकरणाला वारंवार सांगितली होती. साठहून थोडी अधिक वर्षे उलटल्यावर ती प्रत्यक्षात आली (पाहा दैनंदिनी परिच्छेद क्र. 1680).
स्वतःच्या बळावर आपण जे करू शकू अशी कल्पनाही आपण कधी केली नसेल, त्याहून कितीतरी अधिक करण्यासाठी देव अनेकदा आपल्याला बोलावतो, यावर चिंतन करा. देवाची स्पष्ट आणि सौम्य वाणी तुम्ही लक्ष देऊन ऐकली आणि त्याच्या आज्ञा पाळल्या, तर प्रभू तुमच्या जीवनातून अद्भुत गोष्टी घडवून आणेल, हे तुम्हाला हळूहळू उमगेल. त्या गोष्टी फार गाजतील किंवा सर्वांच्या नजरेत भरतीलच असे नाही; पण तुम्हाला कधी शक्य वाटले होते, त्याहून त्या कितीतरी मोठ्या असतील. तुमच्या जीवनासाठी देवाची जी इच्छा आहे, तिचे आश्चर्य मानू नका. तो तुम्हाला जे करायला बोलावतो, ते तुम्ही करू शकाल असा विश्वास ठेवायला कचरू नका. “हो” म्हणा आणि बाकीचे त्याच्यावर सोपवा.
हे प्रभू, तू मला जे काही करायला बोलावशील, त्याला मी “हो” म्हणतो. माझी रोजची कर्तव्ये तुला बलिदान म्हणून अर्पण करत, शांतपणे आणि प्रसिद्धीपासून दूर जीवन जगावे, अशी तुझी इच्छा असेल, तर मी “हो” म्हणतो. माझे जीवन लोकांसमोर यावे आणि अशा रीतीने ख्रिस्तसभेच्या भल्यासाठी तू माझा उपयोग करावा, अशी तुझी इच्छा असेल, तरी मी “हो” म्हणतो. हे प्रभू, माझे जीवन तुझे आहे; तुझ्या इच्छेप्रमाणे मला घडव. हे येशू, माझा तुझ्यावर विश्वास आहे.
संत आंद्रेय यांची नाताळची नोव्हेना
परंपरेनुसार ही प्रार्थना 30 नोव्हेंबरपासून नाताळच्या पूर्वसंध्येपर्यंत दररोज 15 वेळा म्हटली जाते.




