देव — काय श्टाखोव्हियाक यांची कलाकृती
व्हिडिओ
तुम्ही दहा लाख डॉलर जिंकले, तर कदाचित तुम्ही असे म्हणणार नाही, “नको, मला फक्त 100 डॉलर द्या; मला तेवढेच हवेत.” तरीही देवाच्या दयेच्या बाबतीत आपण अनेकदा नेमके असेच करतो. देव आपल्याला भरभरून संपत्ती देऊ करतो, पण आपण त्यातला अगदी थोडा भाग घेण्याचे ठरवतो. असे का? त्याच्या दयेला मर्यादा नाही. ती अनंत आहे. देव आपल्या आत्म्यात जे काही करू इच्छितो ते आपल्याला समजले, आणि मग आपण त्याला सहकार्य करून ते करू दिले, तर आपण थक्क होऊ आणि हा अमोल खजिना आपल्याला सापडला याबद्दल सदैव कृतज्ञ राहू. त्याची दया अधिक पूर्णपणे स्वीकारणे अनेकांना कठीण वाटते, कारण असे करण्यात धोका आहे असे कदाचित त्यांना वाटत असेल. तो धोका असा की आपल्याला बदलावे लागेल. दहा लाख डॉलर मिळाले तर तुमचे जीवन बदलेल का? बहुधा बदलेल. त्यामुळे तुमच्या जीवनात बरेच बदल घडतील, आणि ते सगळे चांगलेच असतील असे नाही. पण देवाची दया हा त्याहून अनंतपटीने मोलाचा खजिना आहे. संकोच करू नका! ती स्वीकारण्याचे धाडस करा आणि तिला तुमच्यात चांगला बदल घडवू द्या (पाहा दैनंदिनी #1017).
देवाची दया स्वीकारताना तुम्ही संकोच करता का? तसे असेल, तर आपल्याला संकोच वाटतो हे ओळखणे, ते मान्य करणे आणि त्यामागच्या कारणाला सामोरे जाणे महत्त्वाचे आहे. देवाला जे काही द्यायचे आहे ते सर्व मोकळ्या मनाने स्वीकारणारे फार थोडे असतात. देवाच्या दयेवर स्वतःला पूर्णपणे सोपवण्याचे धाडस करायला न घाबरणारेही फार थोडे असतात. अशा मोजक्या लोकांपैकी एक होण्याचे ठरवा. देव तुमच्यावर जे काही विपुलपणे ओतू इच्छितो ते निःसंकोचपणे स्वीकारा, आणि त्याच्या कृपेने तुमचे जीवन बदलताना पाहून आनंदित व्हा.
हे प्रिय प्रभू, तुझ्या अपार दयेबद्दल मी तुझे आभार मानतो. तू माझ्यावर इतके परिपूर्ण प्रेम करतोस की तुझ्या कृपेची संपदा माझ्या जीवनात अखंडपणे भरभरून ओतण्याची उत्कट इच्छा तुला आहे. अशा प्रेमाबद्दल मी तुझे आभार मानतो. ही गौरवशाली देणगी स्वीकारताना माझ्या मनात कोणताही संकोच उरू नये. मी तुला आणि तुझी दया माझ्या आत्म्यात जे काही घडवेल ते सर्व मनापासून स्वीकारावे. हे प्रिय प्रभू, मी तुझे आभार मानतो. हे येशू, माझा तुझ्यावर विश्वास आहे.
सामान्य काळासाठी पवित्र शास्त्रावरील चिंतन




