मराठी

चिंतन 243: येशूचे ज्यांच्यावर प्रेम आहे त्यांच्यासाठी त्याची खास देणगी

परमपवित्र त्रैक्य, लॉरेन्स ओपी यांची कलाकृती, CC BY-NC-ND 2.0.

व्हिडिओ

तुमचे ज्या व्यक्तीवर प्रेम आहे, तिच्याशी तुम्ही कसे वागाल? आपल्या कुटुंबीयांना किंवा अगदी जवळच्या मित्रांना जे सर्वांत हिताचे आहे आणि ज्याने त्यांना आनंद मिळेल, तेच त्यांना लाभावे, अशी सहसा आपली इच्छा असते. देवाचीही आपल्यापैकी प्रत्येकासाठी हीच इच्छा आहे. परंतु देवाच्या दृष्टीने आपल्या आनंदाचा स्रोत कोणता आहे आणि आपल्या सर्वांत जास्त हिताचे काय आहे, हे पाहून आपल्याला आश्चर्य वाटू शकते. शिवाय, प्रत्येक आत्म्यावर देवाचे प्रेम परिपूर्ण असले, तरी जे त्याच्या जवळ येतात, त्यांच्यासाठी ते प्रेम अधिक गहिरे होते, असे म्हणणेही योग्य आहे. त्याचे प्रेम बदलते असे नाही; तर ते प्रेम अधिक खोलवर स्वीकारले जाते आणि अनुभवले जाते. असे घडते तेव्हा देव आपले प्रेम अतिशय गहिरेपणाने प्रकट करू शकतो. एखादा आत्मा जेव्हा देवाचे प्रेम अगदी अंतःकरणाच्या गाभ्यात स्वीकारतो, तेव्हा तेच प्रेम अनेकदा त्या आत्म्याला दुःख सोसण्यास बोलावते. याचे आश्चर्य वाटत असेल, तर येशूवरील पित्याच्या परिपूर्ण प्रेमाचा विचार करा. पित्याने पुत्रावरील आपल्या परिपूर्ण प्रेमापोटी त्याला क्रुसाकडे बोलावले. पण त्याच क्रुसावर येशूच्या मानवी आत्म्याला पित्याचे प्रेम सर्वांत गहिरेपणाने प्रकट करता आले. हे गूढ समजून घेणे कठीण आहे. त्यामुळे ते लगेच उमगले नाही, तरी काळजी करू नका. एवढेच लक्षात ठेवा की देवाने ज्यांना आपल्या अतिशय जवळ आणले आहे, त्यांच्या जीवनात तो अनेकदा मोठे आध्यात्मिक दुःख येऊ देतो (पाहा दैनंदिनी #1253).

आपल्या पुत्राला क्रुसाकडे बोलावणाऱ्या पित्याच्या परिपूर्ण प्रेमाचे चिंतन करा. या विचारात काही वेळ घालवा आणि त्याचा गूढ अर्थ समजून घेण्याचा प्रयत्न करा. पित्याने प्रेमापोटी पुत्राला हे बलिदान देण्यासाठी कसे बोलावले, हे तुम्हाला समजले, तर देव तुम्हाला त्यागमय जीवन जगण्यासाठी बोलावतो, यामागचे त्याचे तुमच्यावरील परिपूर्ण प्रेमही तुम्हाला उमगू लागेल. देवाच्या प्रेमामुळे तुमचे जीवन ‘सोपे’ होईल, असे समजू नका. त्याचे प्रेम तुमचे जीवन गौरवशाली करील, पण बहुधा दुःखातूनच.

हे पित्या, तुझा पुत्र येशू याच्या दुःखसहनाचे गूढ माझ्या आकलनापलीकडे आहे. तुझी गूढ इच्छा अधिक पूर्णपणे समजून घेण्यास आणि या जीवनातील दुःख अनेकदा तुझ्या प्रेमाचे चिन्ह असते हे ओळखण्यास मला मदत कर. हे प्रिय प्रभू, सर्व परिस्थितीत माझी नजर क्रुसावर खिळलेली राहू दे. हे येशू, माझा तुझ्यावर विश्वास आहे.

सामान्य काळासाठी पवित्र शास्त्रावरील चिंतन

दैवी दयेवरील आणखी चिंतने

सुवार्तेवरील दैनंदिन चिंतन

आजचे संत व सण