गालील समुद्रावरील वादळात ख्रिस्त, लुडोल्फ बाखहॉयझेन यांचे चित्र
कल्पना करा की तुम्ही एक लहान मूल आहात आणि भर समुद्रात एका छोट्या होडीत आहात. वादळ उठते आणि तुम्हाला कोणत्याही दिशेला किनारा दिसत नाही. लाटांच्या प्रत्येक तडाख्याने होडीचे पुढचे टोक पाण्याखाली जाते, तुम्ही होडीत या बाजूला त्या बाजूला फेकले जाता आणि यातून आपण कसे वाचणार, असा प्रश्न तुम्हाला पडतो. आता कल्पना करा की तुमचे बाबाही तुमच्यासोबत होडीत आहेत. ते तुम्हाला बसायला आणि घट्ट धरून राहायला सांगतात आणि सगळे ठीक होईल अशी खात्री देतात. ते आत्मविश्वासाने होडी सांभाळतात आणि त्यांच्या चेहऱ्यावर भीतीचा लवलेशही दिसत नाही. बाबांचा आत्मविश्वास पाहून तुम्ही शांत होता आणि ते तुम्हाला सुरक्षित ठेवतील असा विश्वास तुम्हाला वाटतो. हे आपल्या जीवनाचे एक चित्र आहे. संकटाला सामोरे जाताना आपण हे लक्षात घेतले पाहिजे की आपण त्या खवळलेल्या समुद्रात सापडलेल्या लहान मुलासारखे आहोत आणि आपल्याला आपल्या दयाळू प्रभूची गरज आहे. अशा वेळी मुलाने होडीचा ताबा घेण्याचा प्रयत्न करणे मूर्खपणाचे ठरेल. त्याचप्रमाणे आपणही आपल्या जीवनाची दिशा स्वतःच ठरवण्याचा प्रयत्न करणे मूर्खपणाचे ठरेल. आपली मने शांत होण्यासाठी आपल्याला येशूच्या अढळ आत्मविश्वासाची गरज आहे. लाटा उसळू लागतात तेव्हा प्रभूच तुमचा सुकाणूधारक असला पाहिजे. जीवनात जे काही येईल ते सर्व सांभाळण्याच्या त्याच्या सामर्थ्याविषयी शंका बाळगू नका (पाहा दैनंदिनी #1322).
जीवनात वादळे उठतात तेव्हा तुम्ही काय करता? तुम्ही घाबरून जाता का? परिस्थिती आपल्या ताब्यात घेऊन सगळे स्वतःच सांभाळण्याचा प्रयत्न करता का? की आपल्या प्रभूच्या सामर्थ्याकडे आणि अढळ आत्मविश्वासाकडे पाहून परिस्थिती त्याच्या हाती सोपवता? येशूकडे वळणे म्हणजे नुसते हातावर हात ठेवून बसणे नव्हे. उलट, स्वतःला पूर्णपणे त्याच्या हाती सोपवून त्याच्याकडे वळणे, ही त्याच्यावरच्या परम विश्वासाची कृती आहे. सगळीकडे गोंधळ आहे आणि परिस्थिती आपल्या आवाक्याबाहेर गेली आहे असे वाटते, तेव्हाच हा विश्वास त्याच्या शांतीसाठी दार उघडतो. त्यामुळे वाटेत काहीही आले तरी तुम्ही सुरक्षित आणि शांत राहता. जीवनातील अडचणींना तुम्ही कसे सामोरे जाता यावर चिंतन करा आणि वादळातून तुमच्या जीवनाची नौका नेण्यासाठी दैवी सुकाणूधारकाकडे वळण्याचा जाणीवपूर्वक निर्णय घ्या.
हे प्रभू, मी विश्वासाने तुझ्याकडे वळतो आणि माझा पूर्ण भरवसा तुझ्यावर ठेवण्याचा निर्णय घेतो. तू सर्व काही सांभाळू शकतोस आणि तुझे प्रेम व काळजी मला सुरक्षित ठेवतील, हे मला ठाऊक आहे. हे प्रिय प्रभू, तुझ्यावरचा माझा भरवसा वाढव आणि माझे हृदय सदैव शांत राहावे म्हणून मला सहाय्य कर. हे येशू, माझा तुझ्यावर विश्वास आहे.




