मराठी

चिंतन 196: इतरांमधील येशूवर प्रेम करणे

 छायाचित्र सौजन्य: अ‍ॅडोबी स्टॉक
व्हिडिओ – अ‍ॅलेक्स प्रोइमॉस, सिडनी, ऑस्ट्रेलिया, CC BY 2.0, विकिमीडिया कॉमन्समार्फत

व्हिडिओ

शुभवर्तमानातील हे वचन आपल्या चांगलेच परिचयाचे आहे: “माझ्या भावांपैकी सर्वांत लहान अशा एकासाठी तुम्ही जे काही करता, ते माझ्यासाठी करता” (मत्तय 25:40). पण या वचनावर तुमचा विश्वास आहे का? असेल, तर येशूवर प्रेम करणे सोपे आहे, हे तुम्हाला उमगेल. तसे करण्याची संधी तुम्हाला दिवसभर, प्रत्येक व्यक्तीच्या भेटीत मिळते. एखादे प्रेमळ स्मित किंवा एखादा आपुलकीचा शब्द यातूनही हे प्रेम व्यक्त होऊ शकते. उदारपणे केलेल्या एखाद्या कृतीतून, क्षमा करण्यातून किंवा सेवेतूनही ते व्यक्त होऊ शकते. पण दुसऱ्या कोणासाठी तुम्ही प्रेमाने जे काही करता, ते तुम्ही येशूसाठी करता. हे खरे आहे. आणि आपण एखाद्याशी कठोरपणे किंवा दया न दाखवता वागतो, तेव्हा आपल्या प्रभूच्या हृदयाला जखम करतो, हेही खरे आहे. हे मूलभूत सत्य विचाराने समजून घेणे सोपे आहे, पण आपल्या कृतींतून ते उमजणे तितके सोपे नाही. दुसऱ्या व्यक्तीत येशूला खरोखर पाहणे आणि त्या व्यक्तीची सेवा करून आपण आपल्या प्रभूवर प्रेम करतो, असा विश्वास ठेवणे कठीण जाऊ शकते. पण या सत्यावर विश्वास ठेवणे कठीण आहे म्हणून त्यावर विश्वास ठेवू नये किंवा त्यानुसार जगू नये, असे नाही (पाहा: दैनंदिनी #1029).

दररोज तुमच्या भेटीला येणाऱ्या लोकांचा विचार करा. त्यांच्याकडे पाहताना, त्यांचे तुमच्यासमोर असणे हे आपल्या प्रभूवर प्रेम करण्याचे आमंत्रण आहे, असे तुम्हाला वाटते का? असे करणे कठीण वाटते का? येशू त्यांच्यात दडलेला आहे आणि आपण त्याच्यावर प्रेम करावे म्हणून वाट पाहत आहे, असा विश्वास आपण ठेवला पाहिजे. आज तुम्हाला भेटणाऱ्या व्यक्तींमध्ये दडून तुमची वाट पाहणाऱ्या प्रभूचे चिंतन करा. त्यांच्याद्वारे आपल्या प्रभूवर प्रेम करण्यास कचरू नका. कारण त्यांच्यात दैवी दयेचा झरा खुला होण्याची वाट पाहत आहे.

हे प्रभू, दररोज मला भेटणाऱ्या लोकांशी मी भरपूर दयेने वागावे, अशी तुझी इच्छा आहे. त्यांच्यात तुला पाहण्याची आणि मला भेटणाऱ्या प्रत्येक व्यक्तीमध्ये तुझ्यावर प्रेम करण्याची कृपा मला दे. हे प्रिय प्रभू, तुला पाहू शकणारी दृष्टी मला लाभो. इतरांमध्ये तू मला दिसू लागशील, तेव्हा त्यांच्यासाठी माझे हृदय उघडण्यास आणि तू मला दाखवतोस त्याच दयेने त्यांच्यावर प्रेम करण्यास मला मदत कर. हे येशू, माझा तुझ्यावर विश्वास आहे.

15 जुलै – संत बोनावेंतुरा, बिशप आणि चर्चचे धर्मपंडित, यांचे स्मरण

दैवी दयेवरील आणखी चिंतने

सुवार्तेवरील दैनंदिन चिंतन

आजचे संत व सण